Manera SMAC mes a bisa: E parade di San Nicolas a duna hopi kippevel. Un parada grandísimo, luhoso y yena di color. Digno di celebracion 70 aña di Aruba su carnaval.
Na inicio di e parada tin e regalo di ATA na Carnaval 70 cu ta e banda di steelband The Invadors, cu ta conta tur cos di historia di steelpan den Aruba su carnaval.
E parada tabata inmenso y no a spera otro pa e di 70 celebracion. Na momento cu e prome grupo a lora pasa Lagoweg ainda e rabo no a sali, pa duna un ehempel di loke por spera diadomingo na Playa.
No menos cu 12 grupo y mas cu mil participante.
E carnaval a cuminsa manera semper na ora y cu e impresionante grupo di TOB di Lisette Chung. Waw, tabata e expresion cu por a scucha momento cu cada participante tabata pasa nan dilanti. Un grupo grandísimo cu nada menos cu 1117 participante. Y esaki cu ta otro aña nan ta celebra nan 25 aña di existencia.
E tema cu nan a presenta cu ne tabata: Mysteries of Africa.
TOB tabata parti den 5 seccion y tabatin 3 banda musical a compaña nan.
E di dos grupo tabata Infinity Carnival group cu tabatin un banda y 103 participante. Nan tema tabata Kingdom of Morroco. Hopi bunita tambe.
E gruponan cu a sigui despues tabata: Royal Carnival Group (The Caribbean) cu 150 participante; Dushi Carnival Group (Aurora Magic of the Northern Light) cu 338 participante; OPC (Cuba in Aruba) cu 250 participante; Colours Carnival Group (Treasure of teh Caribbean Seas) cu 30 participante; Champagne Carnival Group (Hidden gems) cu 1163 particpante cu 30 participante; Unity Carnival Group (Tropical Sunset) cu 20 participante; Los Laga Bay (40 den 70) tabatin 450 participante y un banda musical; Empire Carnival group (Tardezinha) cu un banda y 612 participante Y a cera cu e grupo di Marinierskazerne cu steelband y e Last Lap.
Cuminsando cu TOB, Champagne y sigui te na e grupo di mas chikito, por bisa cu cada un a demostra e luho y beyesa cu a spera di un Carnaval 70. Hopi mas cu e cifranan di aña pasa ora cu tabatin seis grupo y hopi menos participante.
Aruba por ta orguyoso di e beyesa cu e gruponan a duna den nan show na San Nicolas. Y miembronan di SMAC a bisti pa sorprende tambe pa Aruba su di 70 carnaval.
