E organisacion di Werkgevers Arubaanse Bouwnijberheid (WAB) diahuebs a firma un CAO cu Sindicato di Trahadonan di Aruba (STA) den nomber di trahadonan den mundo di construccion.
E companianan cu WAB ta representa ta ALBO, Bohama, AWM, Croon, Thiel Resources, Thiel Corp., Bopel Technical Services.
Pa WAB a hiba palabra Wim Hoenink a gradici tur hende pa e contribucion positivo. Apesar cu e proceso pa yega na otro a dura largo, cu ta algo normal, el a bisa, y no semper ta yega na e punto cu ambos partido kier of ta desea. “Tabatin mester di tempo pa cada partido mustra kico ta e interesnan di cada banda. Mi ta contento cu nos a yega na otro y cu awe por firma un CAO nobo pa e trahadonan,” Hoenink a expresa.
A papia riba hopi tempo, cu algun adaptacion chikito den e CAO, pero esun mas importante, segun Hoenink, e aumento di salario pa e proximo añanan. E CAO ta gewoon un resumen y acumulacion di beneficionan di loke nan a firma e ultimo 35 añanan cu e diferente sindicatonan.
Den e CAO di WAB pa sector di construccion no ta papia di porcentahe pero di suma di placa cu ta wordo otorga.
Pero tambe el a comenta cu e situacion na Aruba no ta bira facil pa e hendenan na Aruba y e peso cada biaha ta bira mas grandi , no solamente pa e trahadonan pero tambe pa e doñonan di trabou. E prima di BBO, el a bisa, sigur no ta yuda mehora e situacion. E ta un peso pasobra tur cos mester wordo importa. “E bida na Aruba pa comerciantenan e ultimo añanan a bira hopi pisa. No ta hayando suficiente proyecto. Tin inversionnan ta wordo haci, pero e desaroyadornan no ta obliga pa tuma contratistanan local.
STA di su banda ta masha gradicido na e delegadonan y igualmente Mediador, ya cu e negociacion no tabata facil. Mester a negocia contracto pa shete compania, segun Diego de Cuba (Presidente di STA). Nan ta contento pasobra a logra aumento y nan tin tambe nan beneficionan secundario.
Pero si de Cuba a remarca cu nan tin un preocupacion grandi pa mundo di construccion y esaki ta loke ta wordo yama “cheap labour”. E ta causa daño na e companianan di construccion, cu ta traha serio y ta cumpli cu nan debernan fiscal. Den esaki , e ta haya cu, Gobierno mester bay hiba un control mas severo riba e companianan cu ta hiba e practica aki. Y pa colmo no tin CAO tampoco pa su trahadonan. A yega di sosode cu companianan, cu no ta ay bo di WAB, ta haya proyectonan y na final no por finalisa e trabou y ta esnan di WAB mester caba cu e trabou. P’esey a entrega un rapport completamente detaya di loke ta e situacion reinante den mundo di construccion. Si Gobierno tum’e na serio, nan lo sali beneficia, pasobra aworaki nan ta perde di gana rond di 50 miyon na impuesto pa aña.
E CAO firma tin un duracion di 4 aña y ta encera aumento, bonus, y beneficio secundario.
