Para den e bario di Madiki kavel, Parlamentario Robert Candelaria a mustra cu AVP kier enfatisa cu pueblo tin derecho un biaha mas di ta goberna door di hendenan cu vision, di mandatarionan cu tin vision pa sigura futuro di ciudadanonan.
“Por ehempel pueblo no kier pa un minister bin insisti cu Aruba ta safe ( den su concepto eroneo ) pero nos kier pa Aruba ta safe den concepto di su ciudadanonan mes. Esey ta seguridad real y no e percepcion di un minister cu kier pa pueblo kere mes cos cune, actua mesun ciego cune y no mira kico ta pasando ultimo temponan.
Un di e cosnan cu nos ta kere hopi den dje ta prevencion di criminalidad y nos ta kere cu un bario manera esaki y demas cu un cancha manera esaki mester wordo cuida.
Mester sigui stimula habitantenan di tur bario cu tin canchanan deportivo manera esaki pa haci mas uso di nan. Esaki lo stimula actividad sano den e bario y lo yuda preveni cu hobennan ta cay den mal caminda, ta locual Robert Candelaria a splica.
Gobierno mester sigui cu plannan manera esaki pa stimula mas actividad den bario manera deporte y arte pa hobennan por tin actividad sano y recreativo pa desaroya nan mes.
Prevencion ta encera tambe pa traha hunto cu partners den field pa señala tempran unda tin hobennan/ hendenan den nos comunidad cu ta vulnerabel, pa yuda nan prome cu e problema bira mas grave.
Prevencion no ta priminti cosnan cu ta zona bunita, pero ta irealistico, prevencion no ta priminti alarma na tur cas, y despues no cumpli. Prevencion no ta encera papia di ta ehecuta un plan integral, pero pueblo ni esunnan cu mester ta parti di e plan no ta mira nada den realidad. Prevencion real ta traha hunto y dirigi pa evita cu hende ta cay den criminalidad of cu ta reduci oportunidad pa crimen.
Nos no por sigui mas cu un gobierno cu ta traha sin vision den nos seguridad.
Con por ta posibel cu tin 13 brommer nobo y djis un man yen di polis pa core nan?
Con por ta posibel cu no tin placa pa klasnan mas grandi di polis nobo, pero tin placa pa un helikopter? Con por ta posibel cu tin hopi auto di polis dilanti wardanan di polis, pero apenas suficiente polis pa pone den e autonan? Con por ta posibel cu overtime ta keda aumenta pero nos no ta mira un plan di minister pa deal cu esaki? Con por ta posibel cu tin placa pa promove sociale crisisplan y cannabis pero no por regla den 6 luna algo basico manera un bureau pa recheche traha aden?
Prevencion ta ora, como gobierno bo ta stimula y yuda carga trabounan manera iglesianan cu ta yuda esunnan cu cay den adiccion pa nan sali di nan adiccion. Awor nos ta mira lo contrario. Ta haci tur esfuerso pa legalisa marihuana y ta bisa cu ta medicinal, pero hendenan cu a cay den adiccion di droga y mester di yudansa, ta wordo neglisha. No ta paga subsidio pa esunnan cu ta traha den fundacionnan Cristian, bisando cu nan a yega edad di pension, siendo cu nos tur sa cu den Cocolishi tin cantidad di hende cu a yega edad di pension cu ta cobra un salario extra tur fin di luna.
Nos kier mira cambionan na bienestar di e pueblo y nos kier mira esakinan pronto. Nos no por sigui tolera cu ta midi cu 2 midi. Tin hopi hende cu mester di yudansa den nos barionan y den nos comunidad. No por ta asina cu e yudansa ta selectivo. Ta netamente esunnan mas vulnerabel ta esunnan cu mester di un man di nos gobierno. No esnan cu ya ta cla caba, cu tin tur cos, pero ainda kier mas,” Parlamentario Robert Candelaria a finalisa bisando.
