Vivian Kock ta un persona hopi conoci den mundo di ranchera pa hopi aña. Pero den e ultimo aña a hay’e den un situacion caminda cu su yiunan a haya nan mes den problema. E tambe tabata cerca na dos diferente ocasion, te asina leu cu a haya publicidad.
Tabata trata di dos Chines di supermercadonan cu kendenan e famia tabatin problema. E prome tabata den Weststraat y e otro tabata den Avenida Boes Orman (ex Arendstraat).
Como mama e kier a aclaria riba e situacion di ultimo biaha. Apesar cu el a bay den un programa pa aclaria, tin hopi cos a sali riba Facebook cu no ta berdad. El a splica cu simplemente nan tabata canando bay Playa. E dos yiunan tabata bay pa hiba formulario di trabao. Na caminda, e tata a drenta e Chines y a pidi pa un di e yiunan mustr’e unda e refresconan y habon blauw ta. E yiu a drenta paden, mientras e mama y e otro yiu a keda pafo, wardando riba nan.
Di repente ta tende e Chines ta bisa e yiu, cu tabata paden pa e sali pafo y cu e lo yama polis p’e. Den esey el a saca un palo pa bin agredi’e. Vivian a saca su yiu pafo y dado momento e Chines, kende ta doño di e luga y un otro persona, a bin pafo. E tata mester a lucha cu nan dos y djey a bin un forsegeo entre e tata / yiunan y e Chinesnan. Vivian mes tabata bisa pa stop. For di eynan nada no a pasa.
Polis a bin despues, y detencion a cay door cu e Chinesnan a uza un arma contra e muchanan. A bin tanto cos riba Facebook, cu a pone cuchiu na e Chines su garganta, cual no ta berdad. E ta haya cu cosnan no mester a bay asina leu.
A mustra un video di pafo, pero nan no a mustra un video di paden. Vivian a dicidi e ora pa bay aclaria e asunto. Na ningun momento e yiunan di dje no a comete ladronicia. Simplemente tabata para den porta, ta warda nan tata caba pa nan sigui move.
Vivian ta comenta cu den tur Chines e ta drenta hunto cu su yiunan pa haci compras, y e no ta haya problema. E ta cana tur caminda cu su yiunan. E muchanan no ta bayendo scol, sino nan ta bay cuminsa cu leerwerk traject cu lo cuminsa nan di dos trimester otro aña.
Apesar di tur e problema cu su yiunan a pasa aden, Vivian ta conta en detayes di e banda bon di su yiunan. Pero un cos si. E tin un mensahe pa e mamanan na Aruba. E ta conseha na tur e yiunan, pa scucha di boso mama, y pa e mamanan sigui papia, y papia cu e berdad.
