Scuchando e reclamo di diferente contratistanan chikito cu ta haci trabao canto di caminda pa gobierno, e Lider di AVP, mr. Mike Eman, ta lamenta cu atrobe decisionnan ta cay cu ta perhudica e contratistanan chikito di famianan humilde.
Hustamente den fin di aña cu mas famianan tin mester di nan entrada, ta mira cu Gabinete Evelyne Wever Croes a tuma un otro medida inhusto cu ta afecta e entrada cu ya ta hopi margina di e contratistanan chikito cu ta traha pa DOW.
Gobierno a dicidi pa forza contratistanan chikito inhustamente den mas dia liber sin pago den fin di aña. Contratistanan cu ta traha a base di servicio – no work no pay – ta perde mas dia cu nan mes ta desea cu e “vakantie obligatorio” cu Gabinete Wever Croes ta impone riba nan. Ta trata di 5 dia extra cu a pone riba e dianan liber sin pago. Den fin di aña nan ta perde 5 dia di trabao cu ta representa ¼ pago di nan entrada pa luna. Esaki ta cay nan hopi duro mes, e lider di AVP, mr. Mike Eman a splica.
Mr. Mike Eman ta bisa di no ta compronde kico ta intencion di Gabinete Wever Croes pa cu e famianan humilde aki. Prome a mira un persecusion partidario cu a kita un cantidad di contratista chikito puro pa motibo di nan color politico y awor ta impone e medida inhusto aki riba e contratistanan chikito. Hunto cu e medidanan cu a aumenta costo di bida ferozmente, cuanto abuso mas Prome Minister Evelyn Wever-Croes ta kere cu e pueblo aki por soporta, e lider di AVP, mr. Mike Eman a termina su observacion cu hopi preocupacion despues di a scucha e dolor adicional aki di contratistanan chikito.
