Via rednan social a promove disturbionan na Hulanda

A aparece varios mensahe riba rednan social pidiendo pa protesta contra e toque de queda dialuna anochi. Hengelo, Nijmegen, Deventer y Enschede entre otro, ta menciona como posibel luganan di disturbio. Aki, e gemeentenan ta tuma e informenan aki na serio y polis ta prepara.

Segun Omroep Brabant, e informenan aki tambe ta circula na Breda, Tilburg y Den Bosch. Tambe a realisa yamadanan na Hoorn. Asina nan ta anuncia orario y luga.

Godfried Adem (Hulanda): Via rednan social a promove disturbionan den varios ciudad

Godfried Adem (Hulanda): Alerta special na Amsterdam pa posibel atentadonan memey di disturbionan

Posted by 24ora on Monday, January 25, 2021

Polis a bisa cu actualmente nan ta ricibiendo hopi yamada di telefon di personanan cu “kier informa riba posibel disturbionan nobo.” Debi na e wachtlijst largo cu a surgi, polis ta enfatisa cu tambe ta posibel realisa e denuncia online.

Ademas, polis ta pidi pa testigonan comparti imagennan di video of potret di, por ehempel, rednan social cu ta mustra cu nan ta preparando pa manifestacion.

Gemeente Hengelo ya conoce e mensahenan cu ta circula. “Polis ta den e estado di “high alert”. Awe nochi nos tin un maneho di “lik op stuk” (faya bo haya aki na Aruba), loke ta nifica cu nos ta interveni di inmediato y nos lo parti boet.”

“Tambe nos a scucha e mensahenan y nos ta tumando nan hopi na serio,” Gemeente Deventer a laga sa riba e convocatorio pa reuni net prome cu e toque de queda cuminsa. Por lo tanto, polis ta preparando pa cualkier disturbio.

Alcalde di Nijmegen, Hubert Bruls, ta informa De Gelderlander cu e ta na altura di e mensahenan riba rednan social. Polis, poder hudicial y gemeente ta prepara pa varios scenario, Bruls ta bisa.

A ataca hospital di Enschede diadomingo

Diadomingo anochi ya tabata tin manifestantenan activo den gemeente di Enschede. A ataca despues e hospital di Enschede Medisch Spectrum Twente (MST). si e protestanan cuminsa bek, polis ta bay tuma medida. 

“Si nan bolbe yama pa protesta, nos ta prepara p’esey.” Ta dificil predici exactamente pakico polis mester prepara. “Ta nifica cu nos ta prepara pa un “worst case scenario.”

Prome minister demisionario, Mark Rutte, a condena e violencia di e fin di siman cu a pasa. A aresta mas di 250 manifestante den varios ciudad, por ehempel, cu a lanta contra polis.