Un rato pasa alrededor di 7:00pm polis a hay’e ocupa un biaha mas cu aglomeracion. E biaha aki tabata na Eagle Beach. Hopi brommer y quadracer cu a sali for di Arashi, den bes di bay nan cas, a dicidi di bay aglomera e biaha aki na altura di Eagle Beach.
Cu presencia di Polis di varios districto, a cuminsa cu un control masal. E control tabatin como consecuencia cu varios motociclista a keda na pia, door di falta di rijbewijs, impuesto paga, falta di seguro of keuringskaart. Polis a confisca varios quadracer y brommer na e sitio.
Un rato prome caba polis tabata man yen cu e grupo di brommer aki, tabatin por lo menos 100 vehiculo na altura di Arashi. Autoridad ta teme cu un grupo den comunidad sea no ta compronde e situacion di Coronavirus, no ta interesa den dje of ta reta polisnan cu mester ehecuta e leynan vigente. Den tur caso, a duna ordo pa aplica e ley cu man duro si ta necesario.
