Un herido cu polis a topa cu ne sangrando profusamente a resulta di no tabata procedente di accidente di brommer, manera el a bisa. E caso aki ta uno hopi mas serio, unda cu e investigacion awo ta den man di Ministerio Publico. Ta trata aki di un maltrato pisa cu por tabatin morto como consecuencia.
E informacion oficial di polis ta bisa cu diadomingo pa 3.45 di marduga a manda un patruya di Noord banda di Imeldahof unda algun persona a mira un homber cu tabata sangra profusamente y tabatin mester di atencion medico.
Un periodista a informa e patruya na e sitio cu e homber herida, a subi den un pick-up Isuzu y a bandona e sitio. Mesora e patruya mesora a coy e caminda mas logico pa hospital y a logra para e vehiculo, un Isuzu D-Max, den area di Bubali.
E polisnan a constata cu e homber tabata sangra masha hopi mes. E tabatin bulto, marca di golpi, na su frenta y diferente herida chikito na su cabes y mannan. A constata tambe un kap na su brasa robes, parti ariba, tambe na esun banda drechi y riba su wenkbrauw. E flanel blanco cu e tabatin bisti tabata tur muha y susha na sanger. E tabatin un tshirt y faha mara na su brasa robes, probablemente pa wanta e sangramento.
Ta trata di e homber di inicial Z., naci na Venezuela. Na prome instante el a bisa cu el a sufri un accidente, hunto cu un amigo, riba un brommer banda di Imeldahof. E amigo a bay lag’e atras. Y tabata e homber cu pick-up a ofrece pa transport’e pa hospital.
A constata cu e tabata nervioso y yen di miedo. E no tabata kier a papia mucho tampoco. Despues a haya un yamada di un testigo cu a mira con a hinca e homber Z. cu un obheto.
Door cu e version di e herido no ta cuadra cu loke a pasa, a dicidi di bay na e sitio pa haci e investigacionnan necesario, pasobra no tabata mustra cu e tabata envolvi den un accidente. No a haya un brommer na e sitio.
Despues a dicidi di bay papia cu e herido un biaha mas y a splic’e cu simplemente nan kier sa kico a pasa cu ne. Segun el a declara, el a haya discusion cu un grupo di persona banda di e truck di cuminda Mexicano, na altura di Lekker. E discusion a sali for di man y nan a atac’e cu un obheto skerpi di glas. El a core bay direccion di e parada di bus, na altura di Imeldahof, pa busca ayudo. E mes no conoce e personanan.
Personal di Bureau Forensisch a bini na e sitio y a tuma e investigacion over y tambe Recherche di Noord.
