Un explosion fuerte a provoca varios herido y daño den e infrastructura di un centro comercial den e estado di Florida (Merca).
E hecho a tuma luga awe diasabra, den e centro comercial The Fountains, den e ciudad di Plantation, cerca di Fort Lauderdale.
Autoridadnan ta afirma cu ta trata di un explosion di gas den un pizzeria desocupa, y ta confirma cu por lo menos 20 persona a resulta herida, AP ta informa.
Otro informacionnan ta mustra cu varios di nan ta den estado critico.
Entretanto oficialnan ta celebra cu te na e momento, ningun hende a perde nan bida apesar di e magnitud di e explosion.
“Danki na Dios, den e momentonan aki (…) ningun hende a muri. Danki na Dios p’esey. Pa mas grave cu e por ta, e por tabata hopi pio,” un miembro di e departamento di bombero a señala.
El a trascende cu e explosion a distrui e restaurant por completo unda cu el a origina y a daña e establecimentonan cercano.
Imagennan di e sucedido ta mustra un destruccion extendi den e area, cu bentana kibra, restonan plama abao y palonan tumba rond.
E explosion parce di a daña ademas seccionnan grandi di e dak di e centro comercial y den e videonan por aprecia murayanan completamente colapsa.
El a sigui splica cu a cera e camindanan cerca di e luga di e suceso y Polis a instrui e localnan pa evita e area.
“Tur e tienda y negoshinan den e area di Fountains Plaza y Plantation Marketplace cerca di LA Fitness lo keda cera te ora cu e personal di bombero por determina cu ta sigur pa bin bek. Por fabor no yega cerca di e area si ta posibel,” polis di e ciudad a comunica.
