E hecho cu detencionnan ta cayendo un tras di otro relaciona cu e fraude cu prueba di vacuna, tin e partido mas grandi den oposicion preocupa. Nan ta sinti cu, mirando e sospechosonan, cu ta hendenan masha yega na Minister Dangui Oduber, cu e chens ta masha grandi cu tardi of trempan e mandatario lo por bira un sospechoso. Nan kier sa si esey ta e caso caba. P’esey a manda pregunta oficial na minister-president puntrando si e por a inform’e di su status den e caso di vacuna y si e tin pensa di want’e den funcion, mientras cu varios di su campañadonan ta cayendo cera.
Parlamentario Gerlien Croes a manda un carta oficial na Presidente di Parlamento di Aruba, den cual ta pidie pa manda su preguntanan na Minister Presidente mr. Evelyn Wever-Croes. Topico di e carta aki ta ‘Investigacion relaciona cu fraude di vacuna’, cu fecha di dia 22 di februari 2022. “Preocupante ta cu e Minister di Salubridad Dangui Oduber, ta directamente envolvi y responsabel pa e nombracion y mantencion na trabou di esunnan envolvi den actonan fraudulento aki y asina facilitando e delitonan ariba menciona. Pa a realisa e benta y falsificacion di e certificadonan di vacuna, e ta rekeri un cadena di colaboracion cu ta inclui accionan for di e Bureau di e Minister di Salubridad”, asina e parlamentario ta skirbi na e Prome Minister di nos pais.
Pero locual ta cambia henter e panorama di e investigacion penal, ta e ley nobo cu Parlamento di Aruba a aproba recientemente relaciona cu e integridad di candidato pa minister y pa ministernan den funcion. Segun Parlamentario mr. Gerlien Croes, cu den e ley nobo aki ta stipula den articulo 16,13 y 2, cu e minister encarga cu e cartera tin e deber pa informa minister-president na momento cu un investigacionan hudicial ta tumando luga den cual e ta envolvi. Croes kier sa si Oduber a informa Wever oficialmene caba cu e ta bou di investigacion. Pa e relato completo, lesa e edicion di TREMPAN di mañan.
