Un compania na Merca ta traha riba un vacuna contra COVID-19 y esaki tin un efectividad di 90%. A puntra diferente persona kico ta nan opinion riba esaki.
Richard Chirino, ciudadano, ta pensa cu esaki ta hopi positivo. Hopi hende lo uza e vacuna pa cura y e contagio no lo ta asina grandi manera e ta aworaki. Si e vacuna keda cla prome cu fin di aña, segun Chirino e si lo tum’e.
Sharine Martinus, ciudadano, a expresa cu e no lo tuma e vacuna, pasobra e tin 60 aña. Tambe e tin sucu y p’esey e mester cuida. E vacuna ta internacional y ya caba a investiga esaki. El a tende cu Organisacion Mundial di Salud (WHO) a bisa cu vacunanan no ta mucho positivo y p’esey nan ta warda cu tur dokternan bisa e ta bon. E ora por vacuna, pero e no ta bay tum’e te ora cu WHO bisa cu por tum’e.
Ciudadano Brandon Oduber a lesa over e vacuna, pero e no lo tene hopi siguransa y no por keda pensa riba vacuna. Ora cu e vacuna ta cla mester mira kico lo pasa despues si tin hende ta bay tum’e. Pero tambe kico gobierno ta bay haci sea ta duna hende of paga p’e.
Parlamentario Setty Yazagaray a indica cu e compania Pfizer ta conoci pero e no sa completamente tur cos di e vacuna. E parlamentario sa cu Merca kier ta esun cu ta logra haya e vacuna prome, mientras Pfizer ta yegando cerca pero hopi test ta tumando luga. Registracion di Food and Drug administration ta haci cierto test y mester pasa diferente rondo prome cu e bira realidad.
Jorgy Mateo, kende ta un fotografo, a bisa cu e noticia aki ta increibel. Pero mester warda p’e vacuna ta completamente cla, pasobra mester mira si e ta efectivo. Segun Mateo, e lo tuma e vacuna obliga pasobra gobierno siguramente lo pone un ley cu ta bisa di no por bay traha of niun caminda sin tin tuma e vacuna. E lo recomenda su famia pa tuma e vacuna, pero ta keda na nan.
