Fiscal di Ministerio Publico ta considera e acusacion contra e ambtenaar Sergio van der Biezen, trahado di Cuerpo Especial Arubano, hopi serio, pa cual el a pidi hues comisario pa prolonga su detencion. Hues a bay di acuerdo cu e peticion y como tal e empleado trahando na Bestuurskantoor, acusa di posecion di un arma di candela, lo no por presenta e siman aki na trabou, pasobra e lo permanece cera den un cel na ward’i polis.
Riba diasabra ultimo pa 7:30pm, el a menasa un trahado di dje cu morto debi cu el a bay cobr’e den Wing Hung Bar & Restaurant, mientras e tabata bebiendo cu dos amigo. Pues separa di ta un ambtenaar cu mester cuida ministernan y e edificio di Bestuurskantoor, e tin un contratista den banda, Serald Construction & Services. E homber a traha p’e, pero e no a pag’e pa dos quincena sigui, balora na 2500 florin. Riba dje, el a fia su mesun doño di trabou 650 florin tambe, cu ainda e no a haya paga bek.
Diasabra anochi e trahado a pasa pa casualidad banda di Wing Hung Bar & Restaurant y a topa cu e auto di su doño di trabou, un Nissan March color blauw numera A-71294 para eyfo. Mesora el a baha pa mira si awe ta su dia di suerte y cu e por cobra porfin. El a topa su hefe sinta na bar ta bebe y a puntr’e pa su salario y e prestamo haci. Sergio van der Biezen a saca 300 florin cash mas 20 dollar duna su trahado. El a bisa cu e no tin mas, pero e trahado a insisti cu e mester su salario, pasobra e debe huur di apartament y otro gastonan mensual cu no por warda mas riba dje.
Ey a start un intercambio di palabra y den e proceso, dos hoben sinta banda di Sergio van der Biezen a lanta cu e trahado. Nan a bay pafo y hunto cu Sergio a cuminsa menasa e homber cu nan lo “bal’e”. Den e proceso, nan a cuminsa coba bou sienta di e auto y a mustr’e un arma di candela, pa intimid’e. Ta net na e momento ey, manda pa Dios, un patruya di polis a yega di sorpresa riba e trio. Ora a controla e auto, a bin topa cu un arma di candela bou di e sienta, cu ta cuadra cu locual e trio a menasa e homber cu nan lo mat’e.
E hecho cu Sergio van der Biezen ta un ambtenaar, specificamente trahando pa husticia di nos pais, ta haci su caso mas pisa ainda y sin duda Fiscal lo mira e acusacionnan cu un wowo mas skerpi. Publico mester por tin confiansa den empleadonan publico y specialmente esunnan trahando den “ordediensten”.
