Desde awe Randolph Ruiz, e director financiero di WEB Aruba N.V. ta sin trabou y no ta den servicio mas di e compania nacional di produccion y distribucion di awa y coriente. Awe mainta el a acepta e pakete revisa cu Utilities Aruba N.V. a present’e. Su retiro ta drenta na vigor cu forsa retroactivo desde ayera dia 1 di augustus 2021, mesun cos cu Luis Oduber. “Si, mi cliente sigur ta satisfecho”, asina abogado mr. David Kock a comenta na nos un rato pasa.
Manera cu nos a informa den forma di primicia di siman pasa, directiva di Utilities Aruba N.V. a contrata bufete di abogadonan Croes, Wever & Ruiz, pa representa nan den negociacion cu e dos directornan di WEB Aruba N.V., den un esfuerso pa forsa un retiro “boluntario” a base di un pakete di compensacion. Den mundo di negoshi nos ta yama esaki un “golden handshake”, pues ora cu partidonan no tin motibo valido pa kita e otro y ta pag’e un suma cu e no por nenga, pero basta e bay y no divulga nada na ningun hende riba e pakete ricibi.
Cuanto placa a paga Randolph Ruiz, no ta conoci pa nos y su abogado a opta pa no contesta e pregunta ey tampoco. Locual nos sa si ta, cu Randolph Ruiz tin un salario di 20 mil florin pa luna y ta cobra 15 luna di salario pa aña. Pues por spera cu e tin un entrada di mas of menos 300 mil florin pa aña y den su contract ta stipula cu si kit’e sin motibo, cu mester pag’e dos aña di salario. Riba dje mester bin pago di pensioen y cesantia pa e ultimo cinco añanan cu el a traha pa e compania.
Desde diabierna caba Luis Oduber, representa den e negociacionnan pa abogado mr. Chris Lejuez, a tuma e pakete. E abogado a caba di atende otro casonan similar algun tempo atras, manera ta e “golden handshake” pa director di Hospital y tambe pa director di NV Elmar. Pues, el a presenta su oferta y Utilities Aruba N.V. a acord’e y nan a bay fo’i otro.
Luis Oduber ta realisa cu si no ta confie, e ora no tin sentido pa keda den e funcion. D otro banda, su integridad bal mas cu su salario. Pues e no ta dispuesto pa mantene su salario anual di 333 mil florin, sin cu e ta integro y cu e tin cu cumpli cu deseo di Utilities Aruba N.V. aunke nan decisionnan ta contra interes di e compania. E ta prefera di bay pero e lo no firma ningun acuerdo cu ta na desventaha di WEB.
Abogado nr. David Kock, cu a haci varios caso similar den pasado, manera esun di Frank Hoevertsz di e mesun Utilities Aruba N.V. a bin cu su pakete y ora cu abogado mr. Anthony Ruiz a medio para duro, el a splic’e cu e no tin pura pa yega na un acuerdo y lo atende e reunion awe mainta. Tambe el a laga e abogado representante di Utilities Aruba y Gobierno di Aruba sa, cu si e pakete no ta na gusto di su cliente, esta Randolph Ruiz. cu e lo bay corte. E lo a desea pa un hues scucha kico tur ta sosode den WEB, ken ta pone presion y con kier forsa e directornan pa hiba e compania den un direccion cu no ta cumbini pais Aruba.
Pero, manera cu nos tambe a anticipa, Utilities Aruba N.V. no ta den posicion pa e bataya publico aki y tampoco esun legal. No ta bay tanto pa e supuesto disputa laboral, sino e consecuencia politico pa e gobierno cu ni sikiera a forma oficialmente ainda. E tipo di discusionnan asina ta pone un presion enorme riba e partner di coalicion RAIZ, cu a caba di priminti den campaña di caba cu “friends & family” den gobierno, cu persecucion politico, etc. Nan a campaña cu e slogan “Nos no ta nan”, pues cu e partido tin un ideologia moderno, nobo, fresco y transparente. E weganan politico aki pa paga directornan di compania estatal sumanan grandi pa nan bandona nan puesto, no ta pas den e expectativanan di nan votadonan y como tal ta pone e coalicion bou presion.
Cu e realidad ey riba mesa, awe dialuna mainta e ekipo negociado di Utilities Aruba N.V., encabesa pa abogado mr. Anthony Ruiz, a informa e ekipo legal di Randolph Ruiz, esta bufete di abogado David Kock, cu nan ta cla pa “settle” y asina evita e reunion general di accionistanan cu mester a tuma luga awe na Utilities Aruba N.V. Ta parce cu e compania estatal tin un temor grandi pa e reunion tuma luga pasobra esey lo habri un bataya publico cu nan no ta cla pe. Y abogado Kock tabata sa esaki y a tene e carta ey bou di su manga di camisa. Na final el a logra tambe pasobra e compania a hay’e ta acepta e demanda di Ruiz, cu awor ta hay’e ta busca un otro trabou, no pasobra e no ta sirbi como CFO di WEB, sino pasobra e no ta dispuesto pa ehecuta e maneho cu gobierno ta desea pa e hiba, cu ta bay liña recta contra interes di WEB.
