Mi a tuma nota di un practica standard di partido MEP ora nan ta den gobierno. Cada biaha cu un hende of grupo no ta di acuerdo cu nan ponencia of nan accion (medida), e partido ta responde cu atake personal pa purba atacha e bon nomber of reputación di otro nan.
Historia ta ripiti. Na 2007 e politiconan di MEP a ataca e directornan di WEB y Elmar y a publica e salarionan di e trahadonan di ambos compania. E meta di esaki tabata y ainda ta, pa pone trahado di NVs y ambtenaren den mal bista di comunidad.
Esaki ta loke ta sosediendo na WEB Aruba N.V. awor aki. Ultimo dos siman ta “lek” informacion tocante supuesto mal maneho pa asina pone pueblo en contra di e directornan. Asina ora nan kita, pueblo lo no exigi clarificacion di un decision asina drastico.
E directornan no a sigui e mandato di Utilities cu ta en contra di principio di bon gobernacion. E directornan ta “hoofdelijk y persoonlijk” aansprakelijk pa e decisionnan cu nan tuma cu ta of por perhudica e compania. Esaki ta e mensahenan cu a laga ventila pa crea base pa core cu e directornan.
Di locual mi por a distila te awor aki (leasando diferente medio di comunicaion y loke ta “common knowledge”) ta lo siguiente:
- Utilities no ta contento cu e directornan ta operando independiente di politica y na bienestar di WEB Aruba NV y pueblo di Aruba.
- Utilities no ta contento cu WEB no a sigui nan opdracht di bay cu otro compania pa cu fase 4. WEB a opta pa sigui cu e compania Wartsilla pa fase 4.
- Utilities no ta contento cu e directornan, riba peticion di sindicato y trahadornan, a prefera di negosha e inhouding di salario na lugar di impone esaki. By the way otro compania y sindicato a haci precisamente esaki. Pero eynan no ta busca pa bula cabes.
- Utilities no ta contento cu e directornan ta negoshando cu Eagle LNG, cu ta na bienestar di WEB y Pueblo di Aruba. Esaki probablemente ta strobando nan agenda y interes aheno cu nan kier sirbi.
Segun Utilities e dos directornan ta culpabel di mal maneho cu lo a costa WEB y Aruba hopi placa of a stroba WEB y/of pueblo di Aruba di spaar placa (baha prija di awa y coriente).
E dos directornan segun Utilities a resulta di ta incompetente pero toch ta bay over na paga nan probablemente un suma cuantioso pa nan bay. Tur esaki mientras ta pidi trahado entrega pasobra e situacion na Aruba ta hopi delicado.
Ta pinta e trahadonan di e compania estatal y ambtenaren como abusado (sinberguensa) cu ta gana hopi placa y no ta “care” pa otro nan.
Con por hustifica e deroche di placa aki djis pa haya control di e maneho diario operacional di e compania? Ta paga asina hopi placa pa kita e directornan di nan posicion pa asina Utility/RDA mes por negosha cu Eagle LNG e contract cu ta cumbini otro cu no ta WEB Aruba NV y su doño cu ta pueblo di Aruba?
Pueblo corda cu a nos ta doño di tur locual ta di pais Aruba. No ta e politiconan, ni nan amigo cu nan nombra pa sirbi nan interes personal (nepotismo). Ta pueblo ta doño di WEB, Elmar, RDA, Setar, Serlimar, RWZI, ATA y tur nan assets (propiedad y placa).
MEP y RAIZ ta sigui cu e maneho di nepotismo cu pueblo kier a para. Durante eleccion a grita cambio y nos ta diferente pero despues di eleccion nos ta ripara cu nada a cambia. “Nos no ta nan” a bira nos cu nan pa nos mes! Pueblo por sigui sufri.
