Diahuebs mainta e trahadonan di Arubus a bay den welga pa structura salarial, pero tin hopi cos mas ta pasando. Un di e puntonan cu a bin dilanti tabata e parti cu nan no por carga e compania mas. Arubus ta haya subsidio di gobierno, pero ta parti e placa ey cu Arutram y Aruparking tambe. Minister di Transporte, Integridad, Naturalesa y Asuntonan di Adulto Mayor a informa e trahadonan cu tanto Aruparking como Arutram no lo sigui bou Arubus.
Patrick Dake, shop steward di Arubus, a splica cu na 2009 a bisa nan pa entrega indexering sino Arubus ta bay failliet of cera porta, manera awo na 2022. E trahadonan no por sigui carga peso dje compania mas, pasobra nan tambe tin famia pa cria y cos pa paga. E placa no ta yegando.
El a sigui splica cu tanto Aruparking como Arutram ta cay completamente bou subsidio di Arubus. Antes a bisa nan cu e dos companianan aki ta haya subsidio apart, pero esey no ta e berdad. Esey ta e motibo cu no tin placa pa paga e trahadonan di Arubus. Esey kiermen e placa cu ta haya ta bay p’e dos companianan ey.
Loke nan por a bin compronde ta cu lo saca Arutram otro aña fo’i bou di Arubus y pon’e bou AHATA. Casi tur e temponan ey nan tabata practicamente morto caba, segun Dake.
Minister di Transporte, Integridad, Naturalesa y Asuntonan di Adulto Mayor, Ursell Arends, a indica cu den parlamento su persona a anuncia cu esey tabata un punto treci padilanti dje trahadonan. Gobierno como aandeelhouder di Arubus ta convenci cu e miho direccion pa bay ta saca nan fo’i Arubus.
El a splica e manera con ta presenta Arutram, e no ta necesariamente un aspecto di transporte publico. Arutram ta mas un atraccion turistico. E manera cu mester atende cu nan , lo ta miho pa los nan fo’i Arubus.
