E vision di Minister di Transporte pa e maneho di aviacion ta busca un balansa entre mas vuelo y cuida medio ambiente. Aruba no tin hopi control den mundo di aviacion cu ta evoluciona.
Ursell Arends, Minister di Transporte, a splica cu su vision riba maneho di aviacion pa sostenibilidad unda ta tene cuenta riba medio ambiente. El a bisa desde aña pasa Aruba Airport Authority (AAA) a mustra riba e avion electrico presenta. E mandatario ta kere como gobierno, esey ta algo cu nan lo stimula y sostene pa bay mas den sostenibilidad.
Nan ta kere no solamente den e aviacion, e vuelo, e conectividad, pero tambe henter infrastructura por ta haci mas sostenibel posibel.
Varios vuelo no ta bin riba energia electrico. E vuelonan comercial hopi bes ta haci uzo otro tipo di combustibel cu no ta bon pa medio ambiente. Riba esaki e mandatario a indica di ta kere cu henter e mundo di aviacion ta pasando den un transformacion. Ta mira cu pa futuro lo yega na hidrogeno y probablemente Aruba no tin influencia riba esey.
E aerolineanan ta adaptando y por mira cu mas lo transforma den e mundo di aviacion. Directie Luchtvaart ta enfoca hopi riba e parti di siguridad, tambe pa tur esey ta poni na luga. Tur esey ta tratado internacional y Aruba tin di cumpli cu ne. P’esey Aruba lo percura pa cumpli cu nan. Conhuntamente cu e mundo di aviacion, na Aruba tambe mester sigui evoluciona.
Si maneho lo bira manera Hulanda, unda Schiphol a reduci vuelo, e mandatario a splica di no ta bay mira algo asina. Na final di dia e mundo di aviacion tin un efecto directo pa turismo. Turismo ta e economia di Aruba. P’esey nan lo purba trece un balansa entre medio ambiente, naturalesa y economia.
Arends a expresa cu mester keda realistico tambe. Esey ta bin pa motibo cu Aruba no tin mucho control den mundo di aviacion. E mundo di aviacion ta evoluciona, na Aruba tambe ta adapta y yuda pusha esey p’e bira mas sostenibel posibel.
