Union di Organisacionnan Cultural Arubano (UNOCA) a topa cu Formado mr. Evelyn Wever-Croes. Durante e reunion a trece dilanti tres punto cu ta concerni nan mas hopi. A mustra riba e posibilidad di busca mas fondo pa sigui pusha proyecto di cultura.
A splica e formado cu den ultimo aña e subsidio pa UNOCA a baha y esaki tin un efecto negativo riba e inversionnan den sector cultural. Ray-Anne Hernandez, director di UNOCA, a informa cu otro punto mas importante treci p’e formado y gobierno potencial nobo tabata riba educacion cultural. Den ultimo aña a trece dilanti cu educacion cultural ta un parti importante p’e desaroyo cultural pa Aruba. UNOCA no ta mira cu tin suficiente accion tuma den direccion di educacion cultural. Nan kier mira cultura den enseñansa formal, esta di kleuter te cu universidad. Kier mira tambe pa bin cu ne den educacion informal na momento cu ta papia di actividad pafo di scol. Pero tambe pa e adultonan cu ta busca mas informacion cultural. Tambe loke ta siña di arte y e hopi mas.
A papia riba e parti di posibilidad pa nan busca mas fondo sea di Hulanda, Union Europeo, fondo comercial. Tur esaki cu e meta pa yuda engrandece e fondo disponibel cu UNOCA tin y sigui inverti den sector cultural. Tin caba e infrastructura pa duna fondo pa subsidia proyecto cultural y kier sondea posibilidad, y cu e gobierno nobo por logra esey.
Pa cobertura mas amplio, lesa e edicion di TREMPAN mañan.
