Den luna di juni 2021 Aruba a ricibi su prome liña crucero desde maart 2020. E no tawata facil pa Aruba Ports Authority y tampoco pa nos turismo pa bai mas di un aña y tres luna sin ningun barco crucero. Minister Oduber conhuntamente cu APA y tambe ATA a bin ta haciendo hopi esfuerso pa cruceronan por ta bek na Aruba. Di e forma aki na un manera pro activo a aserca cruseronan y a splica kico e situacion ta na Aruba y tambe a comparti e protocolnan cu liñanan crucero. Aruba tawata e prome pais cu cruceronan a cuminsa “sail’’.
Awe nos por ta satisfecho cu e cantidad di barconan crucero gradualmente ta aumentando. Den luna di augustus 2021 Aruba lo bay ricibi 8 calls cu ta un aumenta gradual den comparacion cu luna di juli 2021.
Cu esaki Aruba ta sigui den su recuperacion di su turismo crucero. Sigur esaki ta crea oportunidadnan pa nos economia, pa cuponan di trabou, pa e tour operator-, taxista- y restaurantnan. Pero tambe pa pais Aruba.
Mescos tawata e caso cu e bishitantenan stayovers, turismo crucero lo mira un crecemento gradual. Minister Oduber tin e confiansa cu recuperacion di turismo crucero tambe ta sigui segun e proyeccionan di APA.
E desaroyo di nos turismo crucero ta hopi importante pa nos recuperacion. E ta importante pa Aruba Ports Authority pero tambe pa nos turismo y economia.
Turismo ta e pilar number uno di nos isla y nos tur a nota e importancia di e industria di crucero den nos economia, awo cu esaki tabata inactivo pa mas di un aña. Awo nos ta den e proceso di recuperacion y mescos cu ta sosodiendo cu aerolineanan, awor nos ta enfoca tambe riba e liñanan crucero pa yega nos isla atrobe. Nos a traha duro pa por tin tur protocol di salud na ordo, pa hunto cu e liñanan di crucero nos percura pa bienestar di tur nan pasaheronan, nan tripulacion y sin lubida nos pueblo tambe.
Pa loke ta trata yegadanan di barconan crucero pa e resto di aña Minister Oduber ta bisa: “lo ta bay tin 24 call e aña aki di Carnival Horizon y ta premira cu lo bay ricibi 69 call total pa aña 2021, nos ta hopi contento y agradecido cu nos por a logra convence e dos liñanan di crucero aki, cu ta Royal Caribbean cu tin e liña di Celebrity, y tambe Carnival Cruise Line”. Nos ta mira cu e luna aki lo tin mas call cual ta un bon señal. E ta indicativo di e confiansa cu liñanan crusero tin den nos maneho y nos economia.
Minister Oduber ta hopi satisfecho cu e recuperacion di nos turismo crucero considerando e hecho cu ainda e pandemia t’ey presente. E variante delta ta causando un aumento di casonan substancial na Aruba y nos mester ta hopi vigilante na esaki pasobra e por tin consecuencia pa recuperacion di nos turismo si casonan ta sigui aumenta. Minister Oduber ta sigui recomenda y URGI tur esnan cu ainda no a vacuna pa bay tuma nan vacuna mas pronto posibel pa di e forma aki cuida nan propio salud y proteha nan mes.
