Studiantenan cu ta desea di sigui un programa di intercambio den Reino Hulandes actualmente no tin ayudo financiero manera e programa di Erasmus+, ni guia cu studiantenan internacional si ta ricibi. Desafortunadamente mayoria di biaha niun di e provisionnan aki no ta na disposicion di e studiantenan di Aruba, Curaçao y St. Maarten.
Esaki ta un lastima pasobra e balor agrega di un intercambio ta uno incomparabel. Studiantenan ta ricibi e oportunidad pa desaroya nan mes profesionalmente, sigui materianan cu e institucion local no ta brinda y tambe orienta nan mes riba posibel (otro) programanan di estudio avansa. E programa di intercambio ta crea un ambiente cu ta conduci na circulacion di conocemento y ta crea comprension mutuo den Reino Hulandes. Ademas e por combati y preveni ‘brain drain’ riba e islanan di Aruba, Curaçao y St. Maarten direccion pa Hulanda.
Riba peticion di e Ministerionan di Asuntonan di Interior den Reino Hulandes (BZK) y Ministerio di Enseñansa, Cultura y Ciencia na Hulanda, Utrecht University y Universidad di Aruba a skirbi e rapport ‘Towards a Kingdom Mobility Program’. E rapport y proposicion a ser skirbi den colaboracion estrecho y dialogo entre diferente actor manera studiantenan, lidernan y funcionarionan di institucionnan di enseñansa den Reino Hulandes.
Den e rapport a duna e siguiente recomendacionnan:
- Cuminsa cu un programa piloto pa den e siguiente tres anañan mas studiante por experiencia intercambio entre Aruba, Curaçao, St. Maarten y Hulanda cu un atencion special riba posibel intercambio di forma virtual.
- Percura pa tur studiante y trahadornan cu ta participa den un intercambio ricibi acceso na e diferente servicio y provision cu studiantenan y trahadornan internacional ta ricibi.
Dr. Mieke de Droog representando Universidad di Aruba ta co-autor di e rapport y miembro di e ekipo di e proyecto. Otro colaboradornan ta di Universidad di Utrecht Prof. dr. Wieger Bakker, Boudewijn Grievink MSc, Mayra Keuning MSc y Milou Olthof (cu tambe ta ex-alumna di Colegio Arubano). Mientrastanto e rapport a ser presenta/ofreci na Ministerio di Asuntonan di Interior den Reino Hulandes, cu por cierto a financia e proyecto, y e Ministerionan di Enseñansa, Cultura y Ciencia di e cuater paisnan miembro di Reino Hulandes. E documento ta riba agenda di e consulta regular (Vierlandenoverleg) entre e Ministernan di Enseñansa di e cuater paisnan cu ta programa pa dia 7 di januari 2021.
Universidad di Aruba a informa cu ta dispuesto pa colabora cu Universidad di Utrecht pa coordina e ehecucion di e programa piloto. Di e forma aki por contribui na e exito di e programa piloto y su impacto riba studiantenan di Aruba y Reino Hulandes.
E rapport ‘Towards a Kingdom Mobility Program’ ta complementa e rapport recien publica (riba dia 16 di december ultimo) esta “Kopzorgen van Caribische Studenten” di e “Nationale Ombudsman”. E rapport ‘Towards a Kingdom Mobility Program’ ta disponibel gratis via http://www.ua.aw/goodgovernance/ bou di publicacionnan.
