Un Universidad cu ta resalta ta depende di studiantenan y programanan cu ta di nivel halto. Pa e motibo aki un biaha mas e oficina encarga cu Asuntonan di Studiante di Universidad di Aruba, OSA y docentenan a coordina reconocimento na studiantenan cu mas a resalta den e aña academico 2017-2018.
E ceremonia a tuma luga den un Aula di Universidad di Aruba completamente yen, no solamente di e studiantenan nomina pero tambe nan coleganan, docentenan, como tambe Rector di Universidad di Aruba, Dr. Glenn Thode y nos Minister di Educacion drs. Armando Lampe. E anochi tabata pertenece sinembargo na esnan cu a resalta tanto na nivel comunitario y servicio como tambe na nivel academico.
E studiantenan cu a resalta pa nan thesis di graduacion tabata: • Tanya Kirchner di e facultat di FAS-Social Work & Development • Rogier Henriquez di e faculdad di Derecho • Mary Joan Wardlaw di e faculdad di FHTMS • Thais Franken di e faculdad di FAS-Organization,Governance and Management • Samantha van den Bos di e Faculdad di Finance, Accounting y Marketing.
E MCnan di e anochi Emily van Spaandonk y Mylain Veldman a gradici e representantenan di e cinco organisacionnan activo na Universidad di Aruba, pa asina expresa gratitud pa nan actividadnan. Ta trata aki di Kiwanis Circle K International, Studentenraad Universiteit van Aruba (SUA), y University of Aruba Toastmasters Club y MAGEC. Despues a sigui presentacion di e premio di Liderazgo di Studiante cu sigur a lanta hopi atencion. E ‘Student Leadership awards’ ta reconoce lidernan memey di studiantenan cu a percura pa hisa e nivel di estudio tanto pa den como pafo di e murayanan di Universidad di Aruba.
Liderazgo den forma di accepta un responsabilidad y duna cuenta pa e responsabilidad aki, sa ki ora pa guia y ki ora pa sigui y tin e deseo pa trece cambio positivo tanto den comunidad como na mundo. Pa a keda nomina e studiantenan mester a demostra compromiso na e balornan di husticia, actua segun un concepto propio fuerte; pensamento critico y creativo; tuma risico nan voluntariamente; comunica efectivamente; eherce poder apropiadamente, un sentido positivo di direccion; y inspira speransa.
E nominadonan tur a keda presenta pa e propio studiantenan mes, e facultadnan y e personal, cu despues ta pasa pa un comision di seleccion. Esnan cu a ricibi e premio di “Student Leadership” ta: Michelle van Lont,, Gerardi Lanoy, Gerardi Lanoy, Darryl Wout, Danyela Vasquez, Catherine Carraha, Wouter Roelens, John Hsing, Karina Wadhwani, Justin Mohamed, Roberto Hoyer, Luis Tromp, Sidney Simoons, Mariah Croes, Kenneth Vrolijk.
E Rector Glenn Thode a enfoca riba e balor di studiantenan pa duna un contribucion na sciencia y comunidad, ya cu esaki ta yuda desaroyo di Aruba.
Alabez a aplaudi e iniciativa pa duna reconocimento na e studiantenan cu ta contribui na comunidad. Rector Thode a bisa cu e ta spera cu tur e studiante nan lo sigui riba e caminda di desaroyo, durante nan estudio y despues, pa sigui mehora conocemento y brinda servicio na comunidad. “Ora cu gara e oportunidad pa educacion superior, no ta solamente traha fundeshi propio, pero ta yuda forma un nacion mas exitante, uno mas desaroya y uno mas ilumina,”. Danki special ta bai na tur e sponsornan: ENNIA, SETAR, ,Gianni’s Group Nv,CATC, VanEps Kunneman VanDoorne, , RBC Royal Bank.
