Ta un placer pa anuncia cu dia 26 di maart 2019 a firma e contract entre Union Europeo y gobierno di Aruba pa establecimento di e proyecto-SISSTEM na Universidad di Aruba.
Esaki ta encera cu a aloca un suma di 13.05 miyon EURO pa futuro desaroyo di nos instituto.
Actualmente e contractnan pa maneho di e proyecto ta den proceso di preparacion entre Union Europeo y dos partner di implementacion cu lo asisti cu ehecucion di e proyecto. Ta planea pa firma e contractnan aki pronto, despues di esaki lo start cu implementacion di e proyecto.
Na final di mei, un delegacion substancial di ‘KULeuven’, e partner strategico academico y un di e dos partnernan di implementacion, lo bishita nos Universidad pa discusionnan tocante programa y investigacion y desaroyo di red. E prome ‘cohort’ di e programa Bachelor ta planea pa start 2 di september 2019. Ta premira cu e cohort aki lo ta chikito, ta te na 2020 lo por spera un fluho substancial di studiante pa e programa aki.
E proyecto ta rekeri pa Maria Convent, e edificionan banda di e edificio di La Salle, wordo renoba pa duna les, studia, haci investigacion y como espacio administrativo.
UNDP lo ta e partner di implementacion pa e parti aki di e proyecto. Esaki lo haci posibel pa nos universidad a lo largo por sali di e edificio di APEX y alivia e tension cu tin riba e espacionan pa duna les.
Na 2019 e programa Bachelor y proyecto di PHD lo start. E programa Bachelor ta un STEM curiculo full-time di tres aña cu specialisacionnan den estudio Bio-ambiental; Informatica & Sciencia di Data; y Tecnologia y Ingenieria. Graduadonan di e programa aki lo forma e generacion nobo di ingeniero, analista, diseñado di maneho y investigadonan pa e retonan cu tin pa logra desaroyo sostenibel na isla estado chikito. E programa ta habri pa studiante di VWO cu trayecto di ciencia; candidato di VWO cu no tin trayecto di ciencia por sigui un ‘summer course’; studiantenan di EPI nivel 4 y HAVO lo mester sigui e Programa Academico Basico di un aña cu trayecto di sciencia.
Na 2021 e programa di master ‘Sustainable Island Solution’ lo start, un programa multidisciplinario di 90 credito cu ta prepara studiante pa e desaroyo di solucionnan sostenibel di isla pa e retonan compleho di sostenibilidad na isla estado chikito. E programa ta yama bon bini na studiante for di un variedad amplio di disciplina, incluyendo STEM, ley, ciencia social, economia, estudio di comercio of cualkier estudio cu ta relaciona cu desaroyo sostenibel.
Pa mas informacion: http://www.ua.aw/sisstem/ of [email protected].
