Minister di Enseñansa, Ciencia y Desaroyo Sostenibel Armando (Rudy) Lampe, a manda un carta pa Management Team di Colegio EPI y su director Ryan Maduro den cual e tema ta: “Voorstel Management EPI schooljaar 2020-2021”.
Den e prome parti di e carta, e mandatario ta papia di e palabracionnan haci durante un reunion di dia 4 di februari ultimo cu Unit Managernan di Colegio Educacion Profesional Intermedio (EPI). Pero cu den esaki a bini un cambio debi na e crisis di coronavirus cu a cuminsa dia 13 di maart na Aruba. Pero tambe door cu e recursonan financiero a bira hopi limita.
Den e di dos parti di e carta e ta papia di e “overgangsperiode” unda lesnan ta bay wordo dun ana distancia y den forma virtual. Algo cu EPI a informa caba den luna di April cu nan ta cla pa e fase aki. E mandatario ta bisa den e carta “ nos no por traha mas cu e tradicional rooster unda cu den oranan di mainta ta duna les cu “samenscholing” den un area cera, manera ta e caso awo cu scolnan secundario”. Esaki ta nifica cu e enseñansa forsoso ta bira enseñansa personalisa na distancia y cu poco momentonan di contacto fisico y principalmente coaching den e formacion practico. E enfasis lo ta hopi riba studiamento independiente.
E ta recorda nan tambe cu den e reunion di dia 4 di februari ultimo cu e Unit Managernan di EPI a haci algun palabracion. Mester bini mas combersacion cu e miembronan di Management Team cu tabatin obheccion riba resultado di e procedura di solicitud. E ta informa cu esakinan a tuma luga dia 9 y 10 di maart. Nan a haya nan chens y na di dos luga a keda di bini cu proposicion pa un Management Team entrante e aña 2020 – 2021. E mandatario ta splica cu debi na e crisis esaki ta oblige nan tuma otro escogencianan cu antes. Y ta haci e siguiente proposicion pa aña nobo di scol.
A palabra cu un Management Team nobo di tres persona ta keda instala pa traha riba un EPI uni cu mester combina un Sistema di studio Mericano cu esun Hulandes. Den cuadro di esey, a propone pa Andres Geerman fungi como coordinador di e team cu mester apunta, debi na su experencia cu e Sistema Mericano den unidad di unit Hospitality and Management. E grado di mas halto cu EPI ta otorga ta e Associate Degree. Pa yuda realisa esaki ta na su luga pa haci uzo di Virtual School K12, un programa orienta riba entrenamento di profesion.
E Management Team nobo mester cuminsa cu e transformacion aki den e aña escolar nobo, manera a palabra cu EPI ta dal un inicio nobo den 2020 y ta bira mas un studio dirigi riba profesionl, dirigi riba desaroyo di habilidadnan. Esaki ta nifica cu EPI no ta bay conoce lesrooster mas y tampoco studio den dia, manera scolnan secundario.
E Minister a propone e siguiente personanan pa e Management Team, basta nan bay di acuerdo cu e forma di enseñansa nobo aki. Claudia Whitfield ta reemplasa lrayka Yonez. Y un Management Team consistiendo di tres persona pa tur e unidadnan, consistiendo di Randy Tromp, Andres Geerman como coordinador y Carlos Martinus.
Charlotte Ponticorvo como gerente di unidad di Unit Hospitality; Luis Rodulfo como gerente di unidad di Unit Economie; Reginald Havertong como gerente di unidad di Unit Techniek y encarga tambe pa yuda lanta e estudionan di anochi; Donna Canhigh como Unit Manager di Unit S&S.
Tambe ta informa cu no por bay riba aumento di e compensacionnan debi na e situacion. Mas bien rduccion di salario y compensacion ta bira e realidad nobo, mirando e Sistema nobo di enseñansa den circuito digital y debi na esey e coordinadornan pa guia no ta necesario mas. Y e docentenan lo tin menos ora di trabou
Tur esaki ta haci cu kier pone EPI bou di SEPB, si e fundacion aki bay di acuerdo. Pa duna esaki mas forma, ta firma un acuerdo di colaboracion den cual ta describi con esaki ta hinca den otro. E docentenan ta bay wordo uza den ambos estilo di scol, esta na EPB y EPI.
