Diamars mainta, alarma grandi bati pa un boto cu tabata parcialmente ge-sink den lama. Esunnan riba e boortoren pazuid di Aruba a bati alarma via canal 16 di radio marino. Mesora Aruba Port a activa tur ekipo necesario y a avisa wardacosta, cu na su turno a saca e helicopter. A baha boto di emergencia pa bay tira un bista si tin hende pa yuda. No a mira hende na e boto y tampoco den e area.
Mesora a indica cu lo ta trata di e accion cu a tuma luga marduga. Boto (tipo ‘yola’) yen di droga intercepta den awa teritorial di Aruba den ora di marduga. Ademas di un cantidad grandi droga, a logra detencion diesdos hende abordo, diesun di nan di nacionalidad Venezolano y un solo persona di nacionalidad Colombiano.
Esaki a tuma luga den careda di 1:00 am (marduga) ora cu a cuminsa haya señal cu probablemente lo tin boto cu hende indocumenta drentando costa. A mira movecion di e metalshark di wardacosta den awa y no a tarda mucho cu a logra intercepta e boto.
A bin aden cu 600 kilo di droga, a yega kazerne cu nan y for di aki a transporta dos pickup yen di droga, cu despues di registracion ta keda destrui mesora.
Tin indicacion cu no a logra confisca tur pakete di droga, algun muy probablemente lo a keda ta drif riba lama, igualmente e boto cu no a logra bin aden cu ne. Tur cos ta mustra cu e boto sea nan a purba sink esaki of el a yena cu awa y dificilmente por a trece tera. Solamente e tripulacion cu e droga a trece Savaneta na e punto di sosten
Mainta a resulta cu a mira e cabes di e boto ta sali for di lama. Kiermen e boto no a sink pero si tabata casi full bou awa. E punta so tabata sali. Te asina leu e team di boortoren cu a baha por a mira nomber riba e boto. Ora Wardacosta a confirma cu nan ta reconoce e boto como esun di marduga, tur cos di buskeda a termina y a keda den man di autoridad.Un biaha mas tin di menciona cu e coordinacion entre wardacosta, cuerpo policial y demas departamento di husticia, ta duna bon resultado den frena crimen organisa/ narcotraficacion riba nos isla.
