Autor y poeta Colombiano, Pedro Antonio Vargas Álvarez, ta participa na biblioteca su Festival di Buki pa Mucha. Esaki ta tuma lugar den prome siman di november. Aña pasa sr. Vargas Álvarez a participa pa di prome biaha y el a gusta asina hopi cu el a compromete su mes pa participa un biaha mas.
A puntra e autor kico ta su medio di transporte preferi como cu esaki ta e tema di e festival e aña aki y Sr. Vargas Álvarez a manda algun potret. Sr. Vargas Álvarez ta gusta core cu bus na Colombia y e ta gosa di e paseo sinta den bus pasando den ciudad.
Sr. Pedro a presenta su ‘Cuentos y fabulas infantiles’ durante e prome gira pa scol na Aruba pero tambe el a conta storia y a declama poesia. Despues di a conta e storia den klas e autor a splica su storia un poco mas y a combersa cu e muchanan riba e tema. E autor tin mensahenan y conseho den su storia manera ‘comparti cu otro’, ‘yuda unda cu por’, ‘no ser egoista’.
Sr. Vargas Álvarez pa medio di su storianan ta duna e mensahe di altruismo y determinacion cu segun e, ta modelonan y guia pa comportacion y convivencia sano. Sr. Vargas a nace na Santafe de Bogotá, Colombia. E tabata Alcalde di Guataqui na Cundimamarca. Semper e tabatin un pasion pa skirbi storia pa mucha, poesia y tambe obra di teatro. Sr. Vargas Álvarez ta bishita muchanan di scol na Aruba den siman di dia 4 pa dia 8 di november pa comparti e placer di lesamento.
