Awe diahuebs Corte di Prome Instancia a duna su decision den e caso cuminsa door di Roque Wernet, propietario di e kiosko na Eagle Beach cu personal DIP kier a desmantela un parti nobo cu a wordo construi.
Por corda ainda cu dia 10 di september personal di DIP hunto cu otro funcionarionan a presenta na e sitio cu ekipo pisa pa kibra e pida extra di construccion, manera un afdak, y e rolluikennan cu a wordo poni pa protege e negoshi. Wernet a haci peticion pa adapta e luga pa haci e dos construccionnan ey pero nunca a haya contesta di Gobierno. Y e tabatin hopi molester di personanan desconoci (ladronnan) ora cu e luga keda su so den oranan di madruga.
Mientras cu tempo tabata pasa, el a dicidi cuminsa construi sperando e contesta. Pero a resulta cu DIP su personal a yega dia 10 di september cla pa desmantela e luga. Mesora Wernet a bay Corte y na mesun momento a entrega un obheccion. Hues ta bisa den su veredicto cu DIP como organo di Gobierno mester actua di un forma ordena, mester haci su contestanan por escrito y duna e ciudadanonan chens pa reacciona riba nan decision pa kita cos. Y e ciudadano mester haya chens pa hiba esaki Corte si e no ta di acuerdo.
Mirando cu Wester a bay den apelacion dia 10 di september riba e decision di Gobierno pa deshaci di e construccion, Corte ta bisa cu Gobierno y su departamento no ta autorisa pa kita e construccion. E no a haci ningun evaluacion si e construccion haci a bay segun ley of no.
Gobierno y DIP a actua mucho lihe y inhusto door di ordena pa destrui e construccion prome cu nan como instancia cu ta huur e kioskonan aki, a duna contesta riba nan peticion. Gobierno por a simplemente rechasa e peticion of mustra Wernet cu pa haci tal trabou e mester di un permiso di construccion. Pero nan a keda sin contesta e peticion di Wernet. Teniendo cuenta cu un dia despues di a manda e carta pa Wernet ya caba personal di DIP a bay na e sitio cu ekipo pa kibra e construccion y pa evita cu Wernet ta wordo perhudica, ta schors e decision di “ontruiming” di dia 10 di september, te ora cu un decision riba e obheccion entrega. Abogado mr. Peter Mohammed a representa Wernet den e caso aki.
