Tabata pa mas o menos 10:15pm cu habitantenan di varios bario den e districto di Noord y Paradera a raporta cu coriente a bay. Despues di mey ora caba e tecniconan riba warda di NV Elmar a topa cu e fayo.
A bin resulta cu un blaas di helium color blauw, skirbi riba dje “Happy Birthday” a bay dal riba un kabel di voltahe halto, di 12 mil volt. Mesora e ta causa un corto circuito y e sistema di siguridad y proteccion di e red di distribucion di coriente ta activa y ta baha e sistema pa evita daño.
A topa cu e blaas specificamente den e pal’i luz situa dilanti e percela Tanki Leendert # 214. Aunke cu ey e corto circuito tabata, el a causa cu barionan den den districto di Noord a perde suministro di coriente pa mas o menos 45 minuut.
Aunke cu e sistema di proteccion ta kita coriente pa bon di e red y di e consumidonan mes, toch clientenan no ta aprecia cu coriente ta keda bay cu frecuencia. Ta siman pasa coriente a bay den Bubali y otro barionan den Noord pa motibo di biento fierte cu a pusha un mata riba kabel di coriente. Awe hende a haci aña y un blaas a dal den kabel y atrobe sin coriente.
Cada biaha atrobe ta tende e sugerencia dicon no ta cuminsa core e kabelnan di coriente bou di tera, pa evita e tipo di fayonan asina, cu ta sosode cu mucho frecuencia tras di otro.