No ta prome bes ta scucha cu automobilista ta ocasiona accidente y ta bandona e sitio. Esaki tabata e caso di diadomingo anochi. Despues di 10:30 pm a sosode un accidente den Santa Cruz. E accidente aki a tuma luga na altura di sede di MEP.
Un auto a pasa y a dal un peaton masculino cu net n’e momentonan ey tabata cana cu su cacho. Sinembargo, esun responsabel p’e accidente aki no a keda na sitio y a opta pa bandona.
Polis a presenta n’e sitio rapidamente, mientras cu tabata warda riba ambulance. Na yega di ambulance, di biaha e paramediconan a atende cu e peaton, kende a resulta seriamente herida. Despues cu nan a logra pon’e riba brancard y tabata stabilisa, a transport’e pa hospital p’e ricibi atencion medico avansa.
Polis a cuminsa c’un investigacion pa mira si e camaranan den e area por a capta e auto cu a dal e peaton masculino y lag’e benta banda di caminda, mientras e mes a sigui su caminda.
