Dia 3 di februari lo tin e evento Ban Bula ‘Den Drive-In Truck Fest 2023 organisa pa The Movies Aruba. Devin de Veer, ta encarga cu benta y mercadeo di Gloria, el a comenta cu esaki ta prome bes cu The Movies ta organisa un evento di tal concepto. E anochi lo ta un estilo di “battle of the bands” caminda lo tin cuater banda lo competi pa e premio di 5.000 florin. E cuater bandanan lo ta: Groove Masters, N Fuzion, Youth X-Treme y Buleria.
E anochi mes
Lo cuminsa e anochi aki cu Robert y Su Solo Banda. E organisacion lo rindi un homenahe na Robert JeanD’or pa tur su aporte den e mundo di musica. Durante e anochi aki mes lo trek lot pa asina sa cua banda lo inicia e anochi. Cada banda lo haya 45 minuut pa duna nan miho presentacion riba nan trailer. Lo set up trailer di cada banda musical di tal forma cu ta keda un ronchi memey pa e fanaticonan por ta den e ronchi y jump. E publico lo scoge nan banda faborito door di vota riba un website.
The Movies y Amigo DiDi
“Esaki ta un temporada cu hopi hende ta bebe y lubida di controla nan mes pues nos a opta pa Amigo DiDi ta parti di e evento aki”, asina Devin de Veer a informa. Meta tras di esaki ta pa curasha tur hende cu ta posibel pa disfruta pero di un forma consciente. Pa The Movies y Tropical Bottling ta sumamente importante pa consumi alcohol di un manera responsabel y ta p’esey tambe cada producto ta corda e cliente pa drink responsibly. “Nos kier disfruta y alabes proteha e pueblo di Aruba”, t’e mensahe di Devin de Veer.
Kico bo por spera
Ya caba por cumpra entrada pa e Ban Bula ‘Den Drive-In Truck Fest 2023. E ticket di entrada ta costa 10 florin. Importante pa remarca ta cu e evento aki ta un evento pa adulto (18+) pues no ta descarta cu lo controla na entrada. E espacio den drive-in por carga alrededor di 3.500 persona.
Tur persona interesa por cumpra nan ticket na The Movies @ Principal diahuebs pa diadomingo for di 5:00 pm pa 10:00 pm, na The Movies @ Renaissance dialuna pa diadomingo for di 5:00 pm pa 10:00 pm y na Gloria dialuna pa diadomingo for di 10:00 am pa 10:00 pm. Si resta entrada lo bende na porta durante e anochi di e evento.
Bar y cushina lo ta bon surti. No ta permiti pa drenta cu cuminda ni tampoco bebida, pues lo tin un control na porta. Maske cu tur hende tin custumber pa drenta cu auto den drive-in, durante e anochi aki esaki no lo ta posibel.
