Dialuna anochi prome cu mey anochi un turista perdi a capta atencion di diferente hende riba caya. A avisa Polisnan di e dama aki cu tabata riba e caminda di Tanki Leendert. A bay purba yude, pero obviamente e ayudo a sali Polisnan masha caro!
Prome a papia cu e turista no tabata sa unda su hotel ta. Ademas e no kier a subi cu ningun hende den auto. Un polis di Santa Cruz cu a bay busca cuminda na un Fast Food a ser acerca pa un miembro di seguridad cu a mustre e turista Canades. E kiermen cu e turista ta basta fastioso den e area di Tanki Leendert.
E agente femenino a papia cune y asina bay cune hotel a base di loke el a bisa. Ora cu tabata na caminda pa supuesto hotel na High Rise el a cambia version. E kiermen cu mester hibe otro caminda. Despues el a bisa e agente cu e ta secuestrando su persona. Pa evita problema y mirando cu e turista femenino a cuminsa bira agresivo, e agente a dicidi di avisa coleganan pa bin buske den Playa. A topa e patruya di Playa cu a tume over.
Ora a yega Warda di Playa y a bahe for di auto el a lanta cu e agentenan di Playa tambe. Nan mester a bay tera cune pa wante. A logra pone na boei. Hopi biaha ta tende cu no mester boei hende. Wel esaki ta un pensamento robes pasobra bo no sa nunca ken bo ta topa.
Cu hopi dolor di cabes a logra hiba e turista den warda pa asina presente dilanti sub fiscal. Claramente a mira cu su comportacion a laga di desea cu agresividad y expresionnan basta fuerte. Pero su transporte pa Warda di Polis na Noord no a bay facil, pasobra e turista a rebeldia y kibra dos glas di e dogcatcher. Mester a bahe for di auto y pidi pa un otro dogcatcher sali for di otro warda pa bin buske. Mientrastanto ya caba el a comete daño grandi na e prome auto di Polis.
Cada biaha cu tabata trata na atende cune e tabata insulta y tira skop pa stroba e trabou di Polis. Cu hopi tactica Polisnan di Noord y Playa a logra baha e turista for di porta di patras na warda y sali cune pa warda di Shaba. A pone na boei na man cu pia. Ademas dos agente a bay cune sinta patras den e dogcatcher. Nan kier a garantisa cu e lo no bati su curpa herida su mes. A wante te ora yega warda di Noord.
