Relaciona cu e esfuerso continuo di Aruba Tourism Authority (A.T.A.) y AHATA pa desaroyo productivo di nos turismo, a reuni cu entre otro KLM y TUI NL awe. E siman aki ta dedica atencion na e mercado di Europa, esaki lo ta promordialmente na ‘ITB 2019’, cu ta e conferencia di biahe y turismo mas grandi na mundo, teni anualmente na Alemania.
Pa loke ta e reunionan cu KLM y TUI NL, ambos compania aereo, KLM como tambe TUI NL, a aumenta nan capacidad di asiento pa Aruba den e ultimo cinco aña. Obviamente esaki ta por medio di un aumento den demanda. E reunionnan a enfoca riba con e negoshi ta moviendo e aña aki, kiko ta spera pa loke ta capacidad aereo pa temporada di winter 2019/2020, y ki reto mester adresa pa medio di ahusta strategia pa 2019. Reunionnan a cana bon y por bisa cu resultadonan te cu awor ta mustra positivo.
E delegacion di Aruba cu ta atende e reunionnan e siman aki ta consisti di Ronella Tjin Asjoe-Croes, CEO di Aruba Tourism Authority, Tisa LaSorte, CEO y President di AHATA, Sanju Luidens-Daryanani, Chief Marketing Officer di A.T.A., Tirso Tromp Area Director pa Europa di A.T.A. y Jaap Ellis, sales and marketing manager Europe. Di parti di KLM a reuni entre otro cu Philip Keulemans, kende ta traha den e departamento di KLM su Network & Planification pa Caribe y Sur America, Gijs van Oostveen, Director Airport Affairs di KLM, hunto cu Emile Arnst, Global Sales Partnerships & Business Development Air France/ KLM, Frank Prilevitz – VP Government Affairs KLM. Di parti di TUI NL a reuni cu Arjan Kers, Managing Director, Manfred Lahey, Head of Product Long-Haul, Koen Klomberg, Marketing Manager Joint Promotions, y Luc Lentjes, Director Product & Yield.
Europa ta un mercado generalmente stabiel pa Aruba. Durante e ultimo añanan, Aruba a haya entre 8 pa 9% di bishitante for di Europa, cu un tempo di estadia di 10 pa 11 dia/anochi. Europa ta pas perfecto den e vision di Aruba pa sigui atrae entradanan mas grandi pa e isla, cu ta e prioridad cardinal. E strategia aki di sigui atrae y traha cu e mercado Europeo ta percura pa otro aspectonan sumamente importante manera diversificacion di mercado, pa nos isla no ta muchu dependiente di e mercado Mericano so. Pero tambe tin cierto mercado ta yuda Aruba subi cantidad di bishitante den lunanan unda ta desea di pusha mas. Esakinan ta algun motibo cu ta sigui prioridad na e mercado Europeo.
