Un pareha cu tabata tin vuelo pa Merca a keda Aruba. Un di nan hasta lo pasa anochi den cel di warda di polis. Diasabra atardi e pareha a yega laat pa nan vuelo cu Spirit rumbo pa Merca. Ora nan a yega na Gate 8 riba tercer piso a resulta cu e vuelo a bay. Manera ta conoci e vuelonan di Merca y pa Merca den fin di siman ta hopi. E aeropuerto ta bira demasiado druk y mester bay sigur tres pa cuater ora adelanta pa evita di perde vuelo. Si bay trempan ta cana e proceso di check in y control di siguridad di Aruba y Merca na tempo. Pa e pareha turista Mericano e cos no a bay bon y avion a bay laga ambos. Nan a rabia.
Autoridad a bay atende cu e situacion. Polis di Grensbewaking a bay mira kico a sosode. A bay yuda e personal di e aerolinea. E situacion no tabata facil pasobra e agente policial a topa cu un turista femenino hopi agresivo y violento. A trata di calm’e pero el a scoge pa dal e polis femenino. E colega cu tambe a yega a bay den accion y pidi yudansa mesora. Mientras tabata purba domina e muhe agresivo, e insultonan y intento tambe tabata bin. Refuerso a bin di diferente districto y departamento riba caya. Finalmente a logra controla e situacion cu yudansa di mas polis. E muhe deteni a haya un lift pa warda pa asina un subfiscal atende cu ne. Tur cos ta mustra cu e lo sosega den un cel di un di e wardanan. E casa si probablemente mester busca un hotel pa e keda y drumi riba cama sin su pareha. A mira cu aunke el a dal e polis femenino, e tambe tabata tin poco sla na su curpa.
