Diadomingo proximo, dia 14 di april lo tuma luga e tan spera Fiesta Rotaria 2024 cu lo ta cuminsando pa 9:00am te cu 6:00pm.
Luis Oduber, Presidente di Rotary Club of Aruba, a cuminsa ta splica un poco di e Fiesta Rotaria cual ya caba e preparacionnan a cuminsa caba. Fiesta Rotaria a cuminsa como un actividad chikito na aña 1960, un fiesta chikito na Sociedad Bolivariana unda e bishitante por a scucha muziek y tabatin co’i come. E asistentenan tabata paga un suma chikito pa entrada.
Cu tempo esaki a crece y na aña 1981, Rotary Club Aruba a dicidi di reinventa e wiel y el a bira un vlooienmarkt loke nos conoce awendia. El a cuminsa na Wilhelmina Park y despues a bay p’e area dilanti Talk of the Town, pa Stadion Guillermo Prospero Trinidad unda cu e ta awendia.
Fiesta Rotaria ta un evento cultural y social, unda cu henter pueblo ta bin presencia e diferente actividadnan. E ta tambe nan evento principal unda cu nan ta haya mas entrada cu cual nan por sigui yuda esunnan mas vulnerabel den comunidad. P’e aña aki nan ta aspira pa genera 300 mil florin netto.
PREPARACION
E esfuersonan di Rotary Club rond di e proyecto, manera semper, a cuminsa for varios luna pasa. No solamente tin un comision trahando riba e parti organisatorio y logistico cual ta crucial, pero tambe tur e miembronan ta activo bendiendo tickets di e tradicional rifa. Por a mira nan riba e ruta di Carnaval, canando banda di e prome premio cu ta un auto Chevrolet Groove LT nobo.
Bert Kramsteeg, Presidente di Comision Fiesta Rotaria, a indica cu e feria lo cubri un espacio grandi pa asina por crea seccion cu ta interes di tur bishitante. Lo tin un feria di cuminda y bebida, un kids corner cu diferente wega pa e muchanan. Naturalmente tambe lo tin e area di mercado popular cu producto nobo of den excelente condicion na prijs di baca flaco. Publico por spera un variacion di paña, comestibel, articulo di cas, hardware, homeware, articulo pa mucha y mata. E preparacion ta tuma hopi tempo pa set up pero nan ta asina leu. Nan lo habri for di 9:00am y lo sigui te cu 6:00pm.
Lo tin tres restaurant presente pa deleita e publico cu nan dushi platonan, pa ora cu nan mester bay lunch. Tur esaki ta bay ta acompaña pa musica.
Stanley Looman, Miembro di Comision di Fiesta Rotaria a splica cu nan tin un programa hinca den otro. Mainta trempan e miembronan di Kibrahacha Club 60+ lo t’ey di mainta trempan, bou di musica di Megateca Genie.
Despues, for di 10:00-11:00am Club di Movimento lo tin un presentacion sorpresa awe mainta aki. Ta sigui pa Pierewietje for di 11:30-1:00pm. E merdia bunita lo t’ey tambe Steph Quant cu lo deleita e publico cu algun cancion.
Pa 3:00pm-4:00pm lo tin musica di Rincon Boyz, sigui despues pa un pauze y nan lo sigui toca bek pa 5:30pm c’un set largo.
RIFA
Rebecca Maduro, Tesorero di Fiesta Rotario, a splica un poco tocante e rifanan di e aña aki como e feria tin como obhetivo principal y unico pa recauda fondo cu posteriormente Rotary Club of Aruba ta reparti entre numeroso instancia den nos comunidad, aportando asina na diferente meta y proyecto social. Ganado di e premionan cu ta inclui tambe pasashi, estadia na hotel, telefon celular, diferente certificado y premio cash, ta keda anuncia durante un sorteo cu ta tuma luga pa 5:00pm na e feria y den presencia di notario.
Carchi pa e rifa ta obtenibel tur dia na diferente punto rond di Aruba, cerca miembro di Rotary Club of Aruba y si resta, e dia di e feria tambe. Pa e lista completo di punto di benta, por mira esaki riba e profiel di Rotary Club of Aruba riba Facebook y Instagram. Pa solamente 25 florin, bo tin oportunidad di gana un auto nobo, ademas di 13 otro chens di ta un ganado di premio.
Rotary Club Aruba ta probecha e oportunidad aki pa yama danki na tur boluntario cu ta coopera cu e realisacion di e feria, pero sigur un danki di curason tambe ta bay na tur patrocinado y socio comercial cu ta aporta sea financieramente, cu ekipo, producto of labor. E invitacion ta keda na Aruba henter pa asisti masalmente na Fiesta Rotaria 2024 y asina yuda otro y yuda nos isla Aruba.
Tocante Rotary Club of Aruba:
Rotary Club of Aruba ta un asociacion cu desde 1938 ta afilia na Rotary International. E ta consisti di lidernan comercial y profesional cu ta duna di nan mes na servicio humanitario. E ta promove e reglanan mas halto di etica den tur ocupacion y ta contribui na e desaroyo di bon boluntad y pas rond mundo. E tin aproximadamente 1.4 miyon miembro boluntario trahando den mas di 46 mil club na mas di 200 pais y teritorio. E club na Aruba actualmente ta presidi pa Luis Oduber.
