Durante e siman tras di lomba, frakshon di PAR a bishitá tur 5 internat di Kòrsou, ku e meta pa sera konosí mas di aserka ku e trabou di internat.
Sra. Pauletta, lider di frakshon di PAR, por konkluí despues di a bishitá i kombersá ku e internatnan, ku tur 5 ta hasiendo, apesar di e problemátika múltiple ku e hóbennan ta drenta kuné, nan máksimo esfuerso pa ku kuido di nos mucha i hóbennan.
E trabou di brinda akohida boluntario i obligatorio na muchanan di entre 4 pa 18 aña te inmenso i sumamente nesesario den nos komunidat. Ainda tin un kantidat di mucha i hóben ku pa motibunan diverso no por keda den nan ambiente di kas i mester haña kuido eksterno. Kasi 240 mucha i hóben entre e edatnan di 4 te ku 18 aña diariamente ta risibí kuido den un internat.
Algun siman pasa Internatnan tabata den publisidat pa motibu di falta di finansa i duda riba e kalidat di kuido ku ta keda ofresé. Netamente esaki tabata motibu ku frakshon di PAR kier a bishitá personalmente tur e 5 kasnan nan aki, pa asina por komprondé e trabou i e nesesidatnan.
A base di e bishitanan por konkluí ku e rekurso finansiero i humano no ta sufisiente. E montante ku kada internat ta haña no ta sufisiente pa brinda e kuido optimal. Ta alentador ku kada internat individualmente ta buska solushonnan kreativo pa solushoná e problema finansiero. Frakshon di PAR ta mira posibilidatnan pa solushoná e problema finansiero di un forma duradero dor di ku e internatnan ta bai traha mas huntu.
Den kuadro di esaki frakshon di PAR lo aserka Minister Koeiman pa informá posibilidatnan pa fundashonnan en general bai traha mas huntu, entre otro dor di sentralisá sierto servisio por ehèmpel atministrashon, ‘centrale inkoop’ i ‘training i bijscholing’.
Un otro punto remarkabel ta ku tur e 5 internatnan a duna di konosé ku kasi mitar di nan hóbennan ta bebe remedi pa kontrolá emoshon i ku mayoria tin erupshon di agreshon. E hóben di mas yòn ku ta bebe remedi pa emoshon tin 6 aña. Ta bale la pena pa hasi un investigashon na e forma di mediká nos mucha i hóbennan i evaluá si esaki ta efektivo. Den kuadro di esaki frakshon di PAR lo aserka minister Camelia Römer di salubridat pa ku posibilidat di e investigashon aki.
Huntu e internatnan tin un kantidat di aña di eksperensia i den kuadro di esaki kualke kombersashon tokante e kuido i servisio ku gobièrnu kier ofresé nan mester ta partner prinsipal i stratégiko pa yega na un solushon duradero pa ku akohida di nos mucha i hóbennan ku no por keda den nan ambiente di kas. Frakshon di PAR lo sigui vigilá e proseso aki di aserka i esaki lo ta un punto di atenshon na momento di atendé ku presupuesto di Kòrsou pa aña 2019.
