Djasabra dia 2 di novèmber 2019, alrededor di 06.04’or, Sentral di Polis a risibí informashon di un kaso di atrako ku tabata tumando lugá na un establesimentu di Horeca den área di Zuikertuintje. Na yegada di e unidat, ya e sospechosonan a bai for di e sitio ku algun pertenensia di e víktima. Kontinuando ku e investigashon, unidatnan tantu di e Tim di Mantenshon di Òrdu Públiko komo esun di warda di Punda a bai den Oranjestraat unda nan a bin topa ku dos hòmber sinta den un hanchi.

Na momentu ku nan a mira polis, un di nan a kore drenta un kas, miéntras e otronan tambe a trata di kore bai, pero a keda detené na e sitio. Durante kontrol den un kura di kas djis ei banda, polis a bin topa e pertenensianan di e víktima di e kaso di atrako aki mei mei di algun bola di shushi. Patras di e kas na unda e otro sospechoso a kore bai, a bin topa un arma di kandela. Durante di un entrada hudisial ku a sigui, a logra e di tres sospechoso. Mas leu e investigashon a produsí diferente artíkulo, prosedente di otro kasonan di atrako i ladronisia ku tambe ta den investigashon. Personal di e Tim di Atrako ku tambe tabata na e sitio, ta kontinuá ku e investigashon. A presentá e trio sospechoso, e hòmbernan S.H.C., D.A.D. i M.K.B. di respektivamente 16, 22 i 30 aña, tur tres nase na Kòrsou dilanti di un fiskal ouksiliar, ku a ordená nan enkarselamentu pendiente di mas investigashon. 

Comments

comments