Diasabra merdia despues di 2’or Polis a ricibi informe cu mester a tuma luga un accidente na Santa Cruz y e chauffeur cu a causa e accidente aki a bay for di e sitio. Pa suerte tabatin un otro chauffeur testigo, kende a bati alarma cerca Polis y a sigui e chauffeur cu a causa e accidente.
E accidente mes a tuma luga na e T-kruising Santa Cruz banda di e warda polis bieu, e caminda cu ta bay pa e supermercado Fayang. Segun informe compila na e sitio, e chauffeur di edad un tiki avansa tabata core den su auto blanco modelo Daewoo riba e caminda di Santa Cruz bayendo direccion Piedra Plat. Yegando e t-kruising, di repente un Kia lichtblauw modelo Serato a sali for di e caminda di Fayang y a bira su dilanti di golpi. Aki e chauffeur di e Kia a dal kita full e bumper di e auto Daewoo y a djis sigui core bay direccion zuid.
Un señora cu tabata testigo di e incidente, a dicidi di sigui e auto mientras cu Polis a wordo poni na altura. Finalmente e chauffeur cu a hit and run, a yega y staciona su auto KIA Serato den cura di cas na Macuarima 113-B. Aki patruya di Polis a yega y haci nan investigacion. Nan a detene chauffeur di e KIA. Datos di e testigo tambe a wordo tuma. E auto na Macuarima a wordo confisca y getakel.
