RCA “Big Wheel Lottery powered by Powerade” ta ranca sali diasabra awo pa 8or den CDGPT contra e “benjamin” di Divishon Honor F.C. United.
Esaki ta e ultimo campeonato pa e decada aki, uno cu e Tricolornan a domina completamente. Desde campeonato 2010-11 RCA a hunga 7 final, titula 5 biaha Campeon di Aruba, 4 biaha Campeon campeonato regular, gana 4 titulo Copa Don Elias Mansur, lanta dos biaha Copa Betico Croes y un Campeon Interinsular ABC Cup 2015 na Bonaire. 
RCA e anja aki ta jama bon bini na Head Coach Giovannie Thode, Coachnan Gilberto Spataro y Sjurendi Granviel kendenan ta forma e staff tecnico hunto cu Felix Malmaceda, Icho Matos y Danny Kelly. Pa por jena algun buraco RCA ta jama bon bini tambe na Eric Abdul, Chito van der Biezen, Walter Bennett, Diqion Ras, Jomar Martis kendenan tur a bin cas bek. E anja aki RCA ta ofrece na su fanaticada un “V.I.P. seizoen-kaart” cu pa solamente Awg 125.00 bo por wak tur 18 wega di campeonato regular. Pa muchanan te cu 12 anja e balor ta Awg 50.00.
E “seizoen-kaart” ta obtenibel diabierna awo di 6or pa 8or di anochi na RCA Arena serca Sra. Yazmira Tromp of contact [email protected] tambe por hasi un areglo di pago. Ban jega y jena stadion cu e dushi ambiente tricolor. Un danki special na Famia Odor Big Wheel Lottery y Tropical Bottling Company Powerade cu ta bolbe carga e ekipo. #RCApaBida
Photo Credit: 297sports y Futbol Aruba
