Ta henter e siman aki Prome Minister mr. Evelyn Wever-Croes ta atendiendo varios reunion di “paga candela”. Dos di su Ministernan, specificamente Minister Xiomara Maduro y Minister Rudy Lampe ta percurando pa bastante tension den comunidad, specialmente bou di gremionan. Den e proceso a ocasiona protesta y escalacion di situacionnan, cu awor e prome mandatario kier evita. “Mi cabes ta yen, nos ta sperando un KB diabierna awo, no tin tempo awo pa e cosnan aki”, esey tabata un frase masha uza e siman aki den sala di Conseho di Minister na Cocolishi.

E siman aki a reuni cu varios compania, organisacionnan y gruponan den nos comunidad cu ta descontento. E ta parti di e strategia di e Minister Presidente, manera el a bisa den su discurso nacional, pidiendo pueblo pa mas pasenshi, comprension y convivencia pa e situacion cu Aruba ta aden. El a menciona na mas di un ocacion, cu e no a hinca Aruba den e problemanan financiero aki, insinuando cu ta e Gobierno anterior a hinca Aruba den debe, pero cu e ta determina pa drech’e si.

E realidad ta si cu CAft a subraya cu ta su mesun Gobierno, esta Gabinete Wever-Croes a aumenta e presupuesto cu mas di 100 miyon florin den aña 2018. Mayoria costo tabata mara na personal adicional cu Gobierno a tuma e ultimo aña, siendo cu a palabra cu lo baha e gastonan di empleado publico.

Pero e siman aki, tanto cu Comerciantenan Uni, sindicatonan y ayera cu e docentenan, e mesun Prome Minister a haci un apelacion personal na tur e gremionan aki pa tene poco pasenshi. E no por bisa tampoco si lo por cumpli of no cu nan, debi cu no sa ainda ki medida Hulanda lo tuma contra Aruba diabierna awor den e reunion di Conseho di Minister di Reino. Hopi a cuestiona, cu si Gobierno sa cu lo bin medida, dicon no a lanta bay Hulanda pa purba convence nan y evita un “KB”?

Fuentenan na Den Haag di otro banda a bisa cu henter siman pasa Secretario di Estado, Raymond Knops, a purba haya contacto cu Prome Minister Wever pero sin ningun resultado. Durante nan ultimo reunion na Hulanda e lo a bisa e prome mandatario di Aruba di no tin ningun confiansa mas den dje, pasobra e no a cumpli cu su palabracion di november 2018.

Cu e actitud di e Minister Presidente, sin lubida e tension halto causa dor di Lampe y Maduro…y comosifuera poco, awor e retiro inespera di Minister Otmar Oduber, ta poniendo un presion enorme riba Evelyn Wever. Ta manera cu a crea un “perfecto storm” e ultimo lunanan, sigui conseho robes, pone prioridadnan robes y manda un señal robes na comunidad, cu awor no ta ked’e nada mas di “Brace for Impact” pa diabierna awor.

Tocante Gabinete Wever-Croes

Dia 22 di september 2017 a tuma luga eleccion Parlamentario na Aruba. Dia 17 di november 2017 a instala Gabinete Wever-Croes, forma pa e coalicion MEP (9), POR (2) y RED (1). Ta despues di 20 aña (1997) cu Aruba ta conoce un Gobierno di coalicion atrobe. Minister Presidente, di Asuntonan General, Integridad, Energia y Innovacion a bira mr. Evelyn Wever-Croes. Minister di Finansa, Asuntonan Economico y Cultura, Xiomara Ruiz-Maduro. Minister di Asuntonan Social y Labor, Glenbert Croes. Minister di Turismo, Salubridad Publico y Deporte, Danguillaume Oduber. Minister di Transporte, Comunicacion y Sector Primario, Chris Romero. Minister di Infrastructura y Medio Ambiente (Vice Prome Minister), Otmar Oduber. Minister di Husticia y Migracion, Andin Bikker. Minister di Enseñansa, Ciencia y Desaroyo Sostenibel, Armando Lampe. Minister Plenipotenciario na Hulanda, Guilfred Besaril, mientras cu na Merca a bira mr. Joselin Barosso-Croes.

Comments

comments