Tres’or den Staten: Gobierno lo splica pueblo di e landspakket y e agenda di ehecucion

Den un reunion programa awe tardi pa 3’or, Parlamento a pidi Gobierno pa splica tur loke ta trata e Landspakket y e Agenda di Ehecucion. E splicacion aki ta tuma luga via un reunion publico. Tur minister lo splica kico ta toca nan Ministerio den e Agenda di Ehecucion.

Negociacionnan ta continua

Negosacionnan entre Aruba y Hulanda ta continua pa loke ta trata e condicionnan pa Aruba bin na remarca pa haya prestamo pa cubri gastonan di Gobierno. Aña pasa, debi na e pandemia di COVID, Gobierno a perde 40% di entrada y no ta den posicion pa cubri e gastonan su so. Por lo tanto, Gobiero mester a busca ayudo, asina Prome Minister Evelyn Wever-Croes a informa.

Unico ayudo cu Aruba a haya ta di Hulanda. E ayudo aki a bin mara na condicionnan. Gobierno di Aruba a negosha hopi luna pa asina suavisa e condicionnan cu Hulanda a impone. Esaki ta e motibo tambe cu Gobierno no a firma di biaha na momento cu Hulanda a presenta e condicionnan y a tuma tur tempo pa negosha y suavisa e condicionnan apesar cu entre otro sindicato di Polis y algun gremio comercial a pidi Gobierno pa firma di biaha.

Dia 13 di november 2020, Gobierno di Aruba y Hulanda a yega na un acuerdo. E condicionnan pa loke ta trata e Landspakket ta conoci y publica. Desde 13 di november pa 1 di februari a negosha riba e ‘timeline’ di ehucion di e diferente condicionnan cu a conduci den un “Uitvoerings Agenda”, un Agenda di Ehecucion cu a firma dialuna.

Siman pasa diabierna Prome Minister a elabora ampliamente riba e Agenda di Ehecucion den un cumbre cu sindicatonan di sector publico, sector semi-publico y sector priva y mediador di Gobierno y tambe den conferencia di prensa dialuna 1 di februari.

Diamars 2 di februari Gobierno a ricibi e Agenda di Ehecucion y a manda esaki pa Parlamento y publica pa henter Aruba por mira cua ta e condicionnan.

Prome Minister a indica cu e pakete ta uno bastante elabora na unda cu constantemente un ekipo grandi ta traha riba dje. E enfasis riba tur e areanan ta pa den e siguiente lunanan investiga y haci estudio y doorlichting. Ta trata temanan di finansas, economia, impuesto, gastonan di sector publico, especialmente salario di trahadonan publico, reformanan di economia, labor, cuido di salud, enseñansa y husticia. Por conclui cu e ensfasis ta pa investiga con e ta na Aruba y compara cu Corsou y Sint Martin y a base di e conclucionnan lo haci cambionan unda cu ta necesario.

E concentracion pa e dianan nos dilanti ta riba e estudionan haci. Ainda no tin ningun decision riba mesa. Y den e cuadro aki, Prome Minister a indica na tur sindicato cu nan lo ta involvi ora ta toca nan area prome cu tuma desicion.

Gobierno ta invita pueblo di Aruba pa sigui e reunion aki pa sa kico e Landspakket y e Agenda di Ehecucion ta encera.