Dos sospechoso di cendemento di candela riba dump na Parkietenbos a parece recientemente dilanti fiscal di husticia den un TOM-zitting. Riba 18 di januari di e aña aki tabatin un candela riba dump, cu despues a resulta di a wordo cendi. E sospechosonan a bay de acuerdo cu e proposicion di fiscal, esta cu cada un mester traha 120 ora di trabao pa comunidad y dos aña di tempo di prueba.
Minister di integridad, transporte y naturalesa, Ursell Arends, a haci denuncia na januari 2022 di e cendemento aki di candela riba dump. Polis a investiga, loke a hiba na e dos sospechosonan en cuestion. Considerando cu nan a admiti y tabata first offenders, Ministerio Publico a ofrece nan un TOM.
Mester adverti tur esunnan cu ta haci nan mes culpabel di cende candela riba dump, cu e delito aki por hinca bo den problema serio cu husticia. Ta taha pa no hacie mas, pasobra tin consecuencia. Cendemento di candela riba dump ta causa peliger pa e bario y ta un menasa pa salud publico den e area y pa henter nos isla.
