Crossing for Prevention ta tuma lugar dia 19 di november. E landado di distancia largo Deaxo Croes lo haci un intento di landa 53 KM km for di Boneiro pa Corsou; no solamente pa demostra curashi, pasion y resistencia fisico y mental, pero tambe pa duna un aporte na tres fundacion cu ta haci un trabao inmenso pa Aruba, Boneiro y Corsou. Cancer ta afecta nos tur y ta p’esey nos tur hunto mester traha y colabora pa yuda cu prevencion di cancer riba nos islanan.
Ta p’esey, mientras cu Deaxo Croes ta sigui prepara su mes fisica- y mentalmente pa e hazaña cu el a pone su dilanti, ta importante pa un y tur sa cu por cuminsa haci donacion caba na e fundacionnan beneficiario di Crossing For Prevention. Abo ta scoge cua bo kier aporta na dje a traves di e website of un transferencia bancario directo. Nan ta: Fundacion CORESA (Colorectal Screening Aruba), Fundashon Prevenshon Curacao y Kankerfonds Bonaire.
Pa yuda bo den e escogencia, nos ta trece dilanti un perfil di cada fundacion pa asina tur hende sa kico cada un ta para p’e y con ta hiba nan operacion. Cada un ta realisa un labor balioso pa e comunidad di nos islanan ruman.
ARUBA – CORESA
CORESA ta para pa Colorectal Screening Aruba, cual ta un fundacion basta hoben lanta door di tres dokter specialista yiu di tera, Christopher Franca, Justin Smit y Marcel Ho-Kang-You. Cancer di tripa, tambe conoci como cancer di colon, cancer colorectal of cancer di rectum, ta un enfermedad cu ta causa cu e celnan den bo colon of rectum pa crece na un manera incontrolabel. Ta importante pa comunidad sa cu, cu solamente un screening bo por salba bo bida pa motibo cu e screening lo por detecta algo cu tin e potencial di bira cancer den futuro y por elimin’e na tempo. Cancer di tripa ta den e top tres tipo di cancer mas comun na mundo. Pa e motibo aki mester bin mas esfuerso den nos comunidad pa educa nos poblacion tocante e riesgo, sintoma y tratamentonan. Pa mas informacion por bishita www.fundacioncoresa.com. Informacion bancario ta: Fundacion Coresa, Aruba Bank, #6031390190.
BONEIRO – KANKERFONDS
Kanker Fonds Bonaire ta funciona cu tres miembro di directiva y shete persona cu ta duna man riba base diario, tur di forma boluntario. Ta ofrece informacion na pashent y ex-pashent di cancer riba, entre otro, con pa sigui biba cu e malesa, ademas di participacion den actividad social y conscientisacion. Entre otro ta organisa lectura cu ta habri na henter comunidad. Na momento c’un persona sa cu e ta pashent di cancer, e por inscribi mesora como cliente di e fundacion. Kanker Fonds Bonaire ta traha completamente riba donacion. Nan tin un sede ubica na caminda La Union 11, ex-cas di pareha Palman cu Fundashon Mariadal a hereda y a pone na disposicion di e fundacion. Pa mas informacion por bishita: www.kankerfondsbonaire.com. Informacion bancario ta: Kanker Fonds Boanire, Maduro & Curiel’s Bank Bonaire N.V. #101191602 of RBC Bank N.V., #84000000180282769.
FUNDASHON PREVENSHON CURAÇAO
Riba iniciativa di professor Dr. H.M. Pinedo y difunto Lionel Capriles, e fundacion aki a lanta dia 23 di december 2008 cu e meta di percura cu mas tanto persona posibel na Corsou ta haci e saminacion necesario pa detecta y consecuentemente trata cancer na tempo. Den sociedad cu Gobierno di Corsou, e sector comercial y otro organisacionnan ta yega na mas tanto persona den grupo di riesgo y yuda pa nan presenta na nan cita di screening. Esey ta posibel door di, entre otro, un acuerdo cu e registro civil di Corsou (Kranshi) cu ta suministra un bista di e personanan di cierto edad. Ta comunica cu nan via post of telefonicamente, brinda servicio gratis di transporte pa y for di e screening y asistencia den pospone e cita pa otro fecha. Ta traha activamente riba screening pa cancer di pecho, di matris y di colon. Pa mas informacion por bishita: www.fundashonprevenshon.com. Informacion bancario ta: Fundashon Prevenshon, Maduro & Curiel’s Bank (MCB), #21684310.
Di antemano, of si bo a hacie caba, Deaxo Croes y tur esunnan tras di Crossing For Prevention ta yama bo danki pa bo aporte y ban encurasha mas hende pa participa tambe.
Si bo no a hacie ainda, bishita www.crossingforprevention pa haci bo donacion facilmente y keda sigui tur desaroyo y preparacion riba e plataformanan social pa e gran fecha di dia 19 di november proximo.
Danki particular ta bay pa e patrocinadonan principal, esta Aruba Bank, Orco Bank, Gomez Coffie, Cas Bon, HBN Law & Tax, Kooyman, ASD, Sun Bum y como tambe partners, Alimentá, Bite Communications, C38TE y Verbum Works.
