Awe nochi pa 9:20pm a start un problema na e cas situa na Boroncana #2-B. Ora Polis tabata na caminda pa e asistencia a mira un auto marca Chevrolet modelo Pickup S10 color shinishi, numera A-43723, cu no a para na e T-Splitsing y cu consecuencia cu a dal den un palo di luz. Tabatin un auto marca Toyota coriendo tras di e Chevrolet. A resulta cu ambos persona coriendo tras di otro tabatin problema cu otro na e cas na Borancana. Polis a logra para e auto den vecindario di Kamay, na Noord.
A tuma e Polisnan basta tempo pa por a compronde kico exactamente tabata pasando. Ta resulta cu e dama tabata biba cu un di e hende hombernan aki, pero pa un of otro motibo a regresa cu su ex. Esun otro a bin busca su pertenencianan bek na e cas, cu a causa cu e “toro di cura” actual no a aprecia y a bira loco.
A start un problema pisa na e cas, pa cual un di e partidonan a dicidi di subi auto y bandona e sitio pa evita escalacion. Ta den e proceso aki, e otro homber tambe a sali cu su pickup nan tras y coriendo nan tras a perde control y dal den un palo di luz, net ora Polis tabata yegando e cas na Boroncana. Pesey e situacion a medio bay for di man, pa cual varios patruya a yega pa reestablece ordo.
Parce cu Polis conoce e dama aki caba y por lo menos un di e hombernan, cu a yega di agredi e dama caba den pasado y a yega di bay cera pa e hecho aki. Pero, manera ta sosode den hopi pareha, despues ta papia e asunto y ta drecha e relacion, ta lubida pasado y ta mira padilanti. Tur esey a parce di a bay masha bon, te ora e ex a presenta pa busca su cosnan.
Lamentablemente e escena amoroso aki, tipo novela, a sosode dilanti muchanan den e auto. Polis mester a maniobra di tal forma pa no spanta e muchanan mucho. Na final, tur tres a compronde otro y Polis no a detene ningun di e “toronan di cura” cu tabata masha rabia. Awe nochi por lo menos un di nan ta bay drumi cu su auto kibra y sin e “amor di su bida”.
