Esaki ta di dos encuesta cu 24ora.com a organisa e luna aki so, relaciona cu e ultimo desaroyonan rond di e condicionnan cu Gobierno di Hulanda a pone pa por fia Aruba un suma di 204 miyon florin pa e siguiente tres lunanan. Na momento cu a pone condicion, dia 8 di juli nos a publica resultado di e prome encuesta den cual 78% a conseha Gobierno di Aruba pa dal bay numa y firma cu Hulanda. Pero e resultado no a cambia mucho awo.
Hopi a pensa cu despues cu e condicionnan a bira conoci y cu politiconan a splica na placa chikito, kico tur e condicionnan aki lo por encera pa perdida di autonomia financiero y hasta perdida di autonomia, nos a dicidi di organisa un di dos encuesta. Esaki pa mira cu si e condicionnan, cu entretanto a bira publico, lo por cambia e opinion di e participantenan.
Ayera e encuesta aki a termina y por mira cu keto bay e gran mayoria, esta 65% di e participantenan ta pensa cu Aruba mester bisa “SI” pa e Rijkswet. Ta bon pa aclaria si cu den e prome encuesta a participa casi 10 mil usuario y den e di dos un total di 3.500 usuario a vota. Asina mes e comparacion ta bisto cu publico, sea no ta compronde e envergadura di e cambionan cu lo por bin, of si ta compronde masha bon pero ta fada di politica tradicionalista riba nos isla.
