Terminal Workers di Astec N.V. den un carta pa agencia y haulernan pa expresa nan malcontento cu un situacion reinante den operacion, cu ta trece peligro cu ne. Apesar cu operacion a bira normal, nan a constata cu ta sigui uza e cantidad di personal manera ora cu tabata Shelter in Place.
Den e carta nan tin miedo cu e cambionan ta perhudicando e servicio cu ASTEC mester brinda na su clientenan pa cual, pa cual ta pidi nan disculpa. Nan ta bisa cu e maneho cu e director di e compania kier hiba ta trece peligro.
Esaki ta contenido di e carta:
Apreciabel Sr/ Sra,
Pa medio di e carta aki nos como Terminal Workers di Astec N.V kier a aclaria algun punto di e situacion actual na waf di Barcadera, mirando cu esaki tin un efecto negativo directo ariba e agencianan y e haulernan. Nos como trahado ta preocupa cu e mal maneho y e decisionnan cu ta wordo tuma den e ultimo tempo nan. Mayoria di nos tin entre 10 pa 21 aña trahando na Astec N.V y nos no por a pensa cu un dia e servicio cu nos ta brinda tur dia na boso, lo wordo afecta asina aki. Perhudicando agencia y haulernan directo. Mirando cu den añanan anterior bou di un otro maneho, e prioridad di ASTEC N.V y su trahadonan tabata pa brinda servicio di e miho manera posibel. Y awor esaki a cambia unda maneho ta bisa su trahadonan cu agencianan mester para warda of grita na piedad di Astec N.V pa ricibi e servicio cu boso ta paga pe. Den e palabranan di e director, “Let them scream!” Y esaki ta pone anos como trahado mustra hopi malo.
For di añanan prome cu 2017 un ploeg den operations pa traha barco y entrega container y demas carga, tabata consisti di 19 trahado pa cada warda. Esaki tabata net suficiente trahado pa por brinda e servicio optimal. Desde 2017 maneho kier a cuminsa corta den e cantidad di personal den Operations Department, e departamento cu ta haci e trabounan necesario pa tur carga ariba barco por yega den e man di agencia. Cortando den personal ta pone cu e PELIGER di e trabou ta bira mas grandi. Y consecuencia di esaki ta cu nos como trahado no por ehecuta nos trabou manera mester ta y agencia nan lo sufri di e esaki tambe. Awo na 2020 cu e situacion fastioso di COVID-19 nos no a spera cu maneho lo bay tuma e oportunidad aki pa haci un wega sushi uzando e situacion di COVID-19 como un smoke screen pa haci mas daño na e servicio di ASTEC N.V. Durante e periodo aki Astec N.V a haci ahustenan pa por a draai segun e regla nan di DVG. Pero awor cu e situacion a bay bek na normal nos ta ripara cu maneho kier haci e cambionan aki permanente pa scapa placa. Caminda den maneho mes, promocionnan extraordinario ta tumando luga. “Buriconan ta traha pa cabay por come.”
Maneho a pone 5 trahado di operations caba den otro departamento. Y tambe a implementa e regla cu si un ploeg NO ta completo, no lo busca reemplasante pa asina yena e ploeg y lo draai a lo minimo. Esaki haciendo nos trabou mas UNSAFE ainda y agencia cu ta paga pa servicio optimal no lo ricibi esaki y nan lo mester warda! Treciendo mas gasto pa boso mes. Nos como trahado a demostra nos mal contento na nos director pero a wordo ricibi cu schriftelijke warning y tambe a wordo menasa varios biaha cu carta di retiro. E maneho cu nos director kier hiba ta unsafe, inhusto y no ta corecto. Como trahadonan di Astec N.V ta pidi disculpa na e agencia y haulernan y ta spera cu e servicio por bay bek na unda tur hende ta contento y satisfecho. Nos ta spera di por a comparti nos preocupacionnan y ta habri pa por dialoga si mester ariba esaki nan.
Saludos,
Astec N.V Terminal Workers
Operations Department
