Un reunion cu a conta cu participacion di basta hende a tuma luga diaranson anochi den Joe Laveist Sportpark. E tema tabata intencionnan di Gobierno pa scolnan publico.
Un di esnan presente tabata cabesante di Abraham de Veerschool (Adv), juffrouw Jane Bueno-Hooft, kende a bisa cu nan a bin ta trahando cu un team hopi duro den e ultimo añanan aki. Por a mira un crecemento positivo den Abraham de Veerschool den tur sentido. Tin hopi cos ainda pa logra cu e team y cu e muchanan. “Den media por a lesa of scucha cu minister di enseñansa tin plannan kisas bon of kisas malo, pasobra mi no conoce su plannan, pero e kier fusiona e scol cu un otro scol cu ta cay bao di un fundacion.” Ora cu el a bay a busca mas informacion, mirando cu e minister ta duna su informacion riba su pagina di Facebook, el a splica cu e otro scol tin problema di cantidad di alumnonan y San Nicolas su cantidad di muchanan ta bahando. Estadisticamente, segun juffrouw Hooft, esaki no ta completamente berdad. Por ta pa un scol e ta mas cu otro.
Den e caso di Abraham de Veerschool, nan ta ok pa e cantidad di alumno. Berdad ta cu e scol no tin e cantidad di alumnonan manera Playa, pero no dje tiki ey cu e no ta un scol. Tin di compronde cu e otro scol tin hopi mas tiki. E minister, pa yuda e otro scol, a pensa e plan di pone Abraham de Veerschool bao di nan fundacion, pa asina por yuda nan. E mester ta net robes. E logica ta bisa cu e mester ta pa robes, cu si e scol tin problema di cantidad di alumno, mester bin na Abraham de Veerschool.
Por a mira tambe cu no ta AdV so cu ta scol publico na San Nicolas e minister ta bezig ta frenando of cambiando di posicion, pasobra por a mira cu e scolnan basico cu ta bin na AdV tambe e minister kier pone bao di un fundacion.
E ta cerando e ora e ader cu ta trece e muchanan na e scol. Si e logra cu e scolnan basico y tambe Prins Bernhard, den e añanan benidero, AdV ta muri un morto natural, pasobra e ora no ta haya e muchanan mas.
E ora no tin sentido pa haci e cambionan aki asina abrupto. E cabesante a splica cu semper ta na fabor di cambio, pero e cambionan mester sosode via di dialogo, “tin cu papia, tin cu planea, scucha di tur banda y wak pa bo yega na un bon plan. Tur por tin idea. Di tur e bon ideanan ta bin un gran idea. E ora bo tin cu dialoga. No cu bo ta djis tir’e den media.” Como cabesante, Hooft mester a scuch’e den media y despues den media mes ta scucha cu Prome Minister ta bisa cu e plannan di e minister no ta sigui.
Sinembargo ta scucha di SIMAR cu e minister ta bay sigui cu e plannan. Nan a papia cu e minister y esey a preocupa Hooft, principalmente debi cu e nunca a haya e documentonan di e Intentie verklaringen cu e minister a firma cu e fundacionnan.
AdV su number ta riba dje. Hooft a sinti cu e scol a manera wordo bendi. Por ta e no ta corecto locual cu e ta bisa pero e sentimento ey no ta kita for di dje.
Ta manera sinti cu e scol a wordo negosha y a trece un tristesa grandi cerca Hooft y su team. Nan a traha hopi duro pa e scol. Locual otro scolnan como fundacion kisas nan tin mas modo of forma cu e mayornan tin, pero na San Nicolas, no tur ora tin moda.
E docentenan ta duna di nan mes pa yuda e muchanan, di un of otro forma. No ta bisa, no ta publica esaki den media y mustra con bon nan ta. AdV ta un scol cu ta para pa e alumno logra su propositonan exitoso. Esey ta loke e scol kier.
Segun cabesante Hooft, a haya hopi pabien di nan 96% di graduado. Pero ainda no di e minister. Por ta e ta bin ainda. Y tampoco directamente di DPS, esta esnan cu ta encarga.
A haya si di e funcionarionan di staff, di HR cu a duna un pabien. Pero bo ta spera di e minister cu ta bisa cu nan a haci bon como e team di AdV school, como scol publico.
Por wak e scol como su yiunan. Pero awo, con cosnan ta bayendo, ta sinti cu e ta pone su yiunan na adopcion. Otro scol mag di adopta nan y haci kico cu nan kier cu e yiu aki. Asina e scol ta sinti. Kisas no ta asina, pero door cu e minister nunca a dialoga, esey lo bay sosode diahuebs posiblemente.
Ta spera cu por compronde e minister mas miho. Pasobra di berdad ta inaceptabel cu un scol publico ta wordo poni bao di un fundacion. E edificio ta patrimonio di pueblo. No por djis regala un edificio na un fundacion. “Ki ta bay pasa cu e posicion huridico di e docentenan y e muchanan, e mayornan. A papia cu e mayornan pa puntra? No ta cosnan pa djis hisa benta un plan. Mester pense bon, tin cu papia, dialoga y kisas cambia aki aya, e ora ta implement’e. Cosnan no ta bay asina,” segun Hooft.
Commandeur Pieter Boerschool
Ustel Cornet, cabesante di Commandeur Pieter Boerschool, a conta cu ora a haya sa cu lo bay bin un fusion entre nan scol cu Graaf von Zinzendorf, nan a scucha esaki riba caya.
E ora poco poco a bin tende cu en berdad esey ta e intencion di e minister pa haci esaki. Pa nan esaki ta inaceptabel, pasobra pakico ta bay fusiona un scol cu ta sinti cu e scol ta funcionando bon.
Como argumento ta wordo bisa cu e cantidad di muchanan ta baha, di cual Cornet ta bisa, kico ta un cantidad.
Si por mira bon, tur e scolnan na San Nicolas, e cantidad ta baha, pero dje drastico cu mester fusiona un scol? Commandeur Pieter Boerschool tin un cantidad di 238 mucha. Na momento cu e refineria a cera, esnan cu tabata biba na San Nicolas, a bay pabao. Pero cu e scol a baha e cantidad di alumno asina drastico, no ta asina. Commandeur Pieter Boerschool tin su existencia y e merece di ta keda manera cu e ta.
Cambio pariba di brug
Si mira bon, ta Colegio San Nicolas, Abraham de Veer y awo Commandeur Pieter Boerschool. Hasta cu por a mira den un aña, Commandeur Kleuterschool no ta existi mas. Nan tin mester di e kleuterschool, pa nan por sigui existi. Manera a wordo bisa caba, pa Abraham de Veerschool tambe existi.
Nan a cera e kleuterschool, pero nan kier e kleuterschool bek. Duna nan esey pa asina nan sigui existi.
Siguiente paso
Commandeur Pieter Boer ta para hunto cu e otro scolnan. Nan t’ey pa sostene otro y ta keda uni cu otro. Esey ta sigur, segun Cornet.
E scol no ta cera pa cambio, ya cu cambio den cada situacion mester bin. Pero e cambio mester bin cu bo ta sinta y papia cu otro. No cu un cos ta poni caba, e ora ta bin papia. Bo ta papia tocante esaki y despues ta bin decisionnan. No cu un decision ta cla caba y e ora kier papia.
Studiante y mayornan solidario
Cornet a menciona di ta hopi contento di a mira presencia di tanto studiante como e mayornan y ta solidario cu e scolnan y tambe gradicido pa e apoyo brinda door di cada un di nan.
Na final el a bisa cu nan ta desea pa e minister scucha e scolnan. Si un scol, manera Graaf von Zinzendorf ta bay bashi, laga nan bay cerca Pieterboer, na luga di nan bay cerca nan. Y tambe nan kier nan kleuterschool bek.