No ta prome biaha, pero ta parce cu DOW ainda no por yega na origen di e problema den e edificio recien renoba di DIMAS y DAO den Paardenbaaistraat. Holo stinki di riool ta penetra den e sistema di airco, cu consecuencia cu ta produci un holo masha desagradabel den e dos pisonan mas abao di e edificio.
Den pasado trahadonan a sali pafo caba como protesta pa e situacion reinando. E tempo ey un compania priva a presenta cu un sistema pa saca e holo y manda holo “mas agradabel” den e edificio. A pensa cu nan a soluciona e fayo mes pa evita ripiticion. Parce cu esey no ta e caso pasobra awe mainta trahadonan a presenta pa traha y a topa cu sorpresa atrobe.
Pafo por lo menos un di e empleadonan a conta nos den un entrevista bibo cu ta e holo ta haci nan malo. Tin trahado cu a saca, otro a bira malo bay cas y sin lubida e clientenan mes cu ta keha masha di e holo. Dado momento e holo a penetra den e prome piso tambe, causando cue trahadonan di eyriba tambe a baha y sali pafo. No ta conoci si DAO tambe tin molester, debi cu nan ta comparti e mesun edificio cu DIMAS.
Trahadonan a keha masha tambe di nan sindicato SEPPA. Nan a bisa cu di trempan nan ta yamando pero ningun di e sindicalistanan no ta contesta y como tal no por asisti nan den e problema. A dicidi e ora pa bandona e edificio sin representacion sindical.
