Diabierna un biaha mas trahadonan di ASTEC a reuni pa dos ora. Polis tabata na e sitio y a pidi pa wak si nan por habri e entrada. Ultimo biaha ningun truck por a sali. E biaha aki, ningun truck por a drenta y ningun truck por a sali. Nan a keda para na ambos entrada.

For di 1’or e trahadonan a cuminsa den un protesta. Papiando cu shopsteward di STA, Jamiro Dijkhoff, e ta conta cu manera siman pasa, nan a para dos ora demostrando nan descontento. Awe un biaha mas, a bolbe para dos ora, mustrando nan descontento di loke ta pasando. Diahuebs a para overtime completo. Nan a coy tur hende di garage, cu no ta certifica bay traha barco. Nan a traha te cu diabierna mainta, haciendo casi nada, baha 7’or, bay cas 8’or. Ya merdia nan tey atrobe. Personanan no certifica, ni 4 ora drumi, cla pa traha. Unico cos cu e trahadonan kier, pa e director sinta na mesa cu nan. Director a manda bisa manager, cu e kier sinta diamars, pero bao di un condicion. Cu nan tin cu traha diabierna, diasabra, diadomingo cu overtime obligatorio. E trahadonan ta dispuesto pa traha, pero kier sinta mesora.

Segun Dijkhoff, si diamars yega e director no sinta, ta manda e manager di garage y human resources y esey ta loke e trahadonan no kier.

 

Entradanan blokia

 

E trahadonan tabata tin dos entrada blokia pa ningun container drenta of sali. Nan a bolbe busca nan hendenan di garage pa bin traha. Ta di spera cu nada no pasa, segun Dijkhoff. Nan a baha 8’or di mainta y nan no tin 4 ora drumi. A yama DTI pa mira kico ta pasando.

 

No tur tabata tey

 

Tin dos grupo. E warda di 4’or a wordo avisa pa nan bin, pero nan a laga sa cu nan lo bin un tiki mas tempran. Ta purba di haci nan best. Pero manera cu por a mira, ta bolbe manda hende cu no ta certifica, pa kibra e trahadonan.

 

Mayoria ta uni

 

Practicamente tur hende ta uni segun Dijkhof. Nan a uni cu un solo meta. Nan kier papia cu e director y no e hefe di garage. E director no ta duna cara. Di tempo cu a sinta, e nunca a presenta, segun Jamiro Dijkhoff.

 

Perhudicando un compania

50 container mester a wordo baha. Cu e operadornan mes, den un ora pa un ora y mey por a wordo baha. Cu esnan cu no ta certifica, a dura te cu 7’or di mainta. E consecuencia ta pa pueblo. Simplemente cu e director no kier sinta cu e trahadonan na mesa.

 

Kico kier tende di dje

Tin hopi cos cu e trahadonan tin cu sinta papia cu e director. Humiyacionnan cu nan a haya. Nan kier pa haci nan manera catibo moderno. Obliga nan pa traha diasabra y diadomingo y ta cosnan cu kier sinta regl’e na mesa. Ta algo cu tin di tur dos banda. Cada biaha cu kier sinta cu e director na mesa, e ta manda otro hende. Al fin y al cabo ora cu papia cu nan, nan ta bisa cu nan tin cu bay gerencia, e ta bira dado momento un bala di ping pong.

 

Casi yega na otro

Segun Dijkhoff, ultimo biaha, ta un cuchiu nan a pone na nan garganta, pa nan sigui un handboek. E handboek cu nan tin, tin asina hopi regla cu pa 2020, cu tur hende ta wordo kita. Gerencia a bisa cu ta all in one package. Si e parti financiero bin, e buki ta bin cun’e.

Cu e trahadonan ta bon paga, segun Dijkhoff, no ta asina. Por ta gerencia, pero nan no.

 

2 ora

Nan tabata tin e 2 oranan di reunion, kico lo bay ta e siguiente paso. Nan ta sinta warda e director, pa asina e duna cara, pa asina nan sa unda nan ta para.