Resientemente Gobièrnu di Kòrsou pa medio di Minister di Eneñansa, Siensia, Kultura i Deporte sra. Marilyn Alcalá-Wallé a instalá ofisialmente e komishon ku ta atendé ku kasonan di muchanan i hóbennan indokumentá i ilegal den enseñansa, e asina yamá: “Adviescommissie Ongedocumenteerde en ilegale jongeren”.
A bin konstatá ku ya pa hopi tempu kaba hobennan ilegal òf indokumentá ta keda varios biaha perhudiká den enseñansa pa motibunan fuera di nan alkanse.
Pa e motibu aki a instalá un komishon ku ta konsistí di diferente aktornan importante i instrumental ku tin di haber ku e tema aki.
E komishon ta konsistí di Sekretario General di Enseñansa, representantenan di Ministerio di Enseñansa, Ministerio di Hustisia, Ministerio di Servisio Públiko (Kranshi), Ministerio di Asuntunan Soshal i di Labor, Ministerio di Salubridat, Servisio di Skolnan Públiko, sindikato di enseñansa, representashon di mayor i direktivanan di skol.
E komishon aki tin e siguiente tareanan:
1.Trese na kla kiko ta e situashon aktual pa loke ta trata muchanan indokumentá i ilegal den enseñansa na Kòrsou.
2. Inventarisá e kantidat di muchanan indokumentá i ilegal ku no a risibí diploma durante e añanan ku ta tras di lomba.
3. Inventarisá e faktornan di protekshon i tambe faktornan di riesgo serka e grupo di hóbennan aki.
4. Inventarisá riba e posibel solushonnan pa enseñansa di fundeshi, enseñansa speshal, enseñansa sekundario, Enseñansa di Fishi i enseñansa avansá.
5. Inventarisá e kantidat di kasonan di muchanan ilegal i indokumentá i referí nan pa ayudo profeshonal kaminda esaki ta nesesario.
6. Hasi inventarisashon basá riba e puntonan ariba menshoná, duna konseho na Konseho di Minister riba pronóstiko i rekomendashon pa aserkamentu di e grupo di muchanan indokumentá i ilegal.
Ku esaki e komishon aki ta sòru pa tur hoben hasi uso di nan derecho i tambe obligashon di partisipá na e proseso di enseñansa, sin ku nan keda perhudiká di partisipá na skol òf risibí diploma pa falta di dokumento.
Di e forma aki Gobièrnu di Kòrsou ta traha huntu pa i realisá e vishon di 0-drop-out i mehorashon di nos enseñansa kaminda tur mucha ta desaroyá segun nan máksimo potenshal, konforme e Akuerdo di Gobernashon 2017-2021.
