Tabata precisamente den e ora druk di mainta, ora sea ta hiba muchanan scol of ta bayendo trabou, cu un truck marca Mack number DT-964 a kibra net na e crusada di Macuarima, na Santa Cruz. Esaki a causa fila for di ambos banda di caminda, haciendo cu trafico a pega pa un bon rato.
E truck tabata carga cu santo y tabata biniendo for di pariba. El a lora bay direcion zuid na e crusada na Macuarima, na Santa Cruz, net banda di “88 foodmart store”. Pero den e lorada, e parti dilanti di e truck no por a wanta e peso mas y e as dilanti a kibra cu a pone ambos taira di e truck dilanti, a sak na banda.
Polis a yega mesora na e sitio, pero no por a haci mucho cos. A limita nan rol na djis guia e trafico y a tuma dato di e chauffeur. A pidi pa un otro compania bin duna un man pa move e truck den banda pa asina trafico por a continua, mientras ta drecha e as.
