Hesus a bisa semper pa nos stima Dios cu henter nos alma, mente, curazon y cu tur nos forsa y stima nos prohimo manera nos mes. Cerca Dios no tin distincion di persona, no tin ningun clase di discriminacion pero tin barera cu hende mes ta construi y cu ta haci nan bida dificil.
Tin hopi hende ta kere den signo y ta nan tin un pensamento, cu tal signo no ta bay bon cu nan y ta yega asina lew di trata otro malo pero tambe nan tin problema na trabao pasobra e hefe tin tal signo, y e hende di e signo ey nan no ta bay bon cune.
Ta algo masha comun bo tende un mayor ta bisa cu e tin dos yiu ta discuti cu otro, pasobra nan signo no ta bay bon cu otro, of hasta den matrimonio tin cosnan straño ta sosode pa motibo di signo. ( Por favor lesa Efesios Capitulo 5 vers 21)
Bou di hubentud ta reina un gran competencia di signo, cual signo ta bon hende, cual signo ta falso etc. Porfabor hubentud lesa Santiago Capitulo 4 ves 7.
Dios a traha nos den su imagen y semehansa y cu no tin nada di signo envolvi den creacion di hende. Dios a traha solo y luna pa separacion di dia y anochi.
Signo ta un creencia falso Egipcio/Griego /Oriental cual ta simplemente un comienso di idolatria y spiritismo cual ta dividi hende, y ta pesey nos por bisabo cu e no ta di Dios.
Colosenses capitulo 3 vers 15-17 ta bisa : Laga e paz di Cristo goberna den boso curazon, pa cual boso a wordo yama den un curpa, y sea agradecido. Laga e palabra di Cristo biba ricamente den boso,cu tur sabiduria, siñando y spiertando otro cu salmo y himno y cantica spiritual, cantando cu gradicimento den boso curazon na Dios .Y tur locual boso ta haci cu palabra of cu echo, haci tur cos den e nomber di Señor Hesus dunando gradicimento door di dje na Dios Tata.
Ta tempo pa nos tur bira conciente , cu Heus Cristo ta Rey y Senor y cu tur rudia mester dobla y tur lenga mester confesa cu Hesus Cristo ta Señor, pa e Gloria di Dios Tata.(Philipenses Capitulo 2 vers 10+11).
No laga signo blokia e amor y comprencion cu mester existi entre abo cu bo ruman, e asunto di signo aki no ta biblico, y por favor no tume como un wega pasobra, den idolatria diabel ta manifesta ,y bo tin hopi chens pa cay den su gara.
Nos ta bibando den tempo trabahoso, den cual scuridad ta aumenta, y su meta ta pa gara hubentud di tur forma , pero nos como mayor mester lanta para duro den oracion, y ayuno, y trece nos yiunan riba e caminda di Dios.( Efesios 6 vers 4).
Mayornan ban uni den oracion contra tur locual ta lanta contra e palabra di Dios, y laga nos mantene e nomber di Cristo Hesus na halto den nos hogar.
