Pronto e artista Angela Croes lo tin un show den Cas di Cultura. “Un canto na mi tera”, ta tema di e evento cu e artista ta organisa den forma di un presentacion musical cu diferente artista y musico.
Angela Croes kier rebiba e tradicion y cultura di Spaña den su show. E produccion musical ta den man di Alberto Lopez. Riba guitara lo resona Ryan Maduro, Zanelti Croes y Denzil Tromp riba percusion y sin laga afo e bailarina Diana Antonette.
E show lo tuma luga dianan 24 y 25 di april, ambos funcion lo cuminsa pa 7:00 pm y ta termina pa 9:00 pm. Lo aplica tur regla di DVG. Carchi ta obtenibel na Cas di Cultura mes.
Angela Croes ta hopi gradecido pa e gran aporte cu e’la haya pa por realisa e serie di shownan aki na Cas di Cultura. Na prome na Cas di Cultura cu a yuda den e parti di pre-produccion y ehecucion. Tambe e ta duna danki na colaborador financiero mas grandi Prins Bernhard Cultuurfonds Caribisch Gebied cu a zorg pa den tempo di Covid evento por a sigui wordo organisa, hunto cu fondonan importante di Hulanda para tras di nan esta Kickstart Cultuurfonds, BankGiro Loterij, VSBfonds y VandenEndeFoundation. Danki grandi pa e aporte di UNOCA, nos fondo local. Ademas a aporta Setar N.V., Beauty Lounge, Departamento di Cultura, Wowo Creative, Gigliola Designs y Elite.
